2024-nji ýylyň 5-nji iýulynda
Birleşen Milletler Guramasynyň Baş sekretary Antoniu Guterriş türkmen
paýtagtyna sapar bilen geldi. Halkara guramanyň ýolbaşçysyny türkmen halkynyň
Milli Lideri, Türkmenistanyň Halk Maslahatynyň Başlygy Gurbanguly
Berdimuhamedow garşylady.
Mälim bolşy ýaly, Türkmenistan
1992-nji ýyldan bäri Birleşen Milletler Guramasynyň doly ygtyýarly agzasy
bolmak bilen, bu iri düzümiň abraýyny artdyrmak ugrunda çykyş edýär. BMG bilen
netijeli hyzmatdaşlyk hem-de ählumumy gün tertibiniň möhüm meseleleri boýunça
çözgütleri işläp taýýarlamak Bitarap Türkmenistanyň daşary syýasatynyň esasy
ugurlarynyň biri bolup durýar.
«Oguzkent» myhmanhanasynyň resmi
wekiliýetler zalynda Gahryman Arkadagymyzyň belent mertebeli myhman bilen
söhbetdeşligi boldy. Türkmenistanyň Halk Maslahatynyň Başlygy we BMG-niň Baş
sekretary köp ugurlary — durmuş-ykdysady, hukuk ulgamyny, ynsanperwer, bilim,
saglygy goraýyş, ekologiýa we beýleki birnäçe ugurlary öz içine alýan däp bolan
hyzmatdaşlygyň berkidilýändigini kanagatlanma bilen belläp, netijeli
gatnaşyklary yzygiderli ösdürmäge taýýardyklaryny tassykladylar. Soňky ýyllarda
toplanan hyzmatdaşlygyň baý tejribesi hem-de onuň köpugurly mümkinçilikleri bu
işde ygtybarly binýat bolup hyzmat edýär. Şunuň bilen birlikde, netijeli
tekliplere, olary durmuşa geçirmek babatda tagallalara esaslanýan gatnaşyklaryň
mundan beýläk-de üstünlikli ösdüriljekdigine ynam bildirildi.
Saparyň ikinji gününde — 6-njy iýulda hormatly Prezidentimiz Serdar
Berdimuhamedow bilen Birleşen Milletler Guramasynyň Baş sekretary Antoniu
Guterrişiň arasynda gepleşikler geçirildi. Ikitaraplaýyn gatnaşyklaryň
taryhynda täze sahypany açan döwlet Baştutanymyzyň we BMG-niň Baş sekretary
Antoniu Guterrişiň duşuşygy paýtagtymyzdaky «Oguzkent» myhmanhanasynda
geçirildi. Ikiçäk we wekiliýetleriniň giňeldilen düzümdäki geçirilen duşuşygyň
dowamynda taraplar dürli ugurlarda hyzmatdaşlygy ösdürmek meselelerini ara alyp
maslahatlaşdylar.
Gepleşikler tamamlanandan soň, döwlet Baştutanymyz ýokary derejeli myhmany
Türkmenistanyň «Magtymguly Pyragynyň 300 ýyllygyna» ýubileý medaly bilen
sylaglady. Bilşimiz ýaly, beýik akyldaryň doglan gününiň 300 ýyllygynyň halkara
derejede baýram edilýän ýylynda döredilen bu medalyň ilkinji gezek Milletler
Bileleşiginiň ýolbaşçysyna gowşurylandygyny buýsançly nygtamak gerek. Abraýly
halkara guramanyň ýolbaşçysy ýokary hormat üçin minnetdarlyk bildirip,
Gündogaryň nusgawy şahyry we akyldary Magtymguly Pyragynyň döredijiligi
dogrusynda öz pikir-garaýyşlaryny beýan etdi.
Aşgabada saparynyň barşynda jenap
Guterriş BMG-niň Merkezi Aziýa üçin öňüni alyş diplomatiýasy boýunça sebit
merkezine baryp gördi hem-de BMG-niň ýurdumyzdaky Hemişelik wekilhanasynyň täze
binasynyň açylyş dabarasyna gatnaşdy. Bu dabara ýurdumyzyň pudaklaýyn
dolandyryş edaralarynyň ýolbaşçylary, ýokary okuw mekdepleriniň rektorlary,
BMG-niň Türkmenistanda işleýän edaralarynyň, köpçülikleýin habar beriş
serişdeleriniň wekilleri, şeýle hem Türkmenistanyň Daşary işler ministrliginiň
Halkara gatnaşyklary institutynyň talyplary uly ruhubelentlik bilen
gatnaşdylar. Dabaranyň dowamynda abraýly halkara guramasynyň ýolbaşçysy
hormatly Prezidentimiz Serdar Berdimuhamedowa we ýurdumyzyň Hökümetine
hemmetaraplaýyn kömegi we işe berýän goldawy üçin tüýs ýürekden hoşallyk
bildirip, Türkmenistan bilen BMG-niň arasyndaky hyzmatdaşlygyň mundan beýläk-de
ileri tutulýan ugurlaryň ählisi boýunça üstünlikli ösdüriljekdigine ynam
bildirdi.
Birleşen Milletler Guramasynyň Baş
sekretarynyň şu gezekki sapary hem-de geçirilen gepleşikler netijeli köpýyllyk
gatnaşyklary giňeltmegiň, ony ählumumy bähbitlere laýyk gelýän täze many-mazmun
bilen baýlaşdyrmagyň ýolunda möhüm ädimdir. Duşuşyklaryň netijeleri boýunça
gazanylan ylalaşyklar 2030-njy ýyla çenli döwür üçin durnukly ösüş ulgamyndaky
Gün tertibiniň maksatlary we wezipeleri bilen baglylykda, täze taslamalaryňdyr
maksatnamalaryň durmuşa geçirilmegine kuwwatly itergi berer.
Aýşirin DÖWLETOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.