Bitaraplygyň we öňüni alyş diplomatiýasynyň mümkinçilikleri
2024-nji ýylyň 7-nji martynda Türkmenistanyň Daşary işler ministrliginiň Halkara gatnaşyklary institutynda «Parahatçylyk we ynanyşmak syýasatyny öňe sürmekde Bitaraplygyň we öňüni alyş diplomatiýasynyň ähmiýeti» atly okuw sapagy geçirildi. Okuw sapagyny Halkara gatnaşyklary we diplomatiýa kafedrasynyň uly mugallymy, filosofiýa ylymlarynyň kandidaty Begenç Karaýew alyp bardy. Oňa institutyň Türkmenistanyň diplomatiýasynyň möhüm ugurlary boýunça okuw merkeziniň “Öňüni alyş diplomatiýasy” ugrunyň talyplary gatnaşdylar.
Okuw sapagynyň dowamynda B.Karaýew şu ýylyň 1-3-nji martynda Türkiýe Respublikasynda geçirilen üçünji Antalýa diplomatik forumynda türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň Bitaraplygyň we öňüni alyş diplomatiýasynyň mümkinçilikleri boýunça eden çykyşy barada giňişleýin gürrüň berdi.
Milli Liderimiziň belleýşi ýaly, Bitaraplyk derejesi toparlanyşyklara gatnaşmazlygy we harby güýji ulanmazlygy göz öňünde tutýar. Bu ýörelgelere näçe köp döwlet eýerse, şeýle çemeleşmäniň tarapdarlary şonça köp, gapma-garşylyklaryň döremek ähtimallygy bolsa şonça az bolar. Şu soragda bitaraplyk sagdyn we jogapkärli güýçler, aýry-aýry döwletler ýa-da ýurtlaryň topary üçin ugur alyş nokady bolup biler. Munuň özi gapma-garşylykly ýagdaýlary aradan aýyrmaga mümkinçilik berýär, ýüze çykýan dawalar nähili kyn hem dowamly bolsa-da, olary parahatçylykly usullar, gepleşikler arkaly çözüp boljakdygyny görkezýär.
Okuw sapagynyň ahyrynda talyplar özlerini gyzyklandyrýan soraglary berip, olara degerli jogaplary aldylar.
Abdykerim ANNAÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.