“Birleşen Milletler Guramasynyň nusgasy” atly okuw-paýhas bäsleşigi geçirildi
2024-nji ýylyň 28-nji maýynda Halkara ynsanperwer ylymlary we ösüş uniwersitetinde “Birleşen Milletler Guramasynyň nusgasy” atly akyl-paýhas bäsleşigi geçirildi. Türkmenistanyň Bilim ministrliginiň geçiren bu bäsleşigine Türkmenistanyň Daşary işler ministrliginiň Halkara gatnaşyklary institutynyň, Halkara ynsanperwer ylymlary we ösüş uniwersitetiniň, Magtymguly adyndaky Türkmen döwlet uniwersitetiniň, Döwletmämmet Azady adyndaky Türkmen milli dünýä dilleri institutynyň, Ýagşygeldi Kakaýew adyndaky Halkara nebit we gaz uniwersitetiniň, Aba Annaýew adyndaky Halkara atçylyk akademiýasynyň talyplary gatnaşdylar.
Bäsleşigiň esasy maksady ýurdumyzyň ýokary okuw mekdepleriniň talyp ýaşlaryna Birleşen Milletler Guramasynyň Baş Assambleýasynyň işiniň gidişi, onda kabul edilýän maksatnamalar, BMG-niň düzümindäki ýolbaşçylaryň hem-de işgärleriň wezipeleri we jogapkärçiligi, ylalaşyklaryň gazanylyşy baradaky giňişleýin düşünjeleri bermek, şeýle-de ýaşlaryň dil bilimini hem-de dilewarlygyny ösdürmekden ybarat bolup durýar. Bäsleşigiň düzgünleri boýunça talyplar BMG-niň düzüminde ýerleşýän Energetika howpsuzlygy we Halkara parahatçylygy komitetlerine bölündiler. Bu akyl-paýhas bäsleşigine gatnaşan talyplaryň hersi Birleşen Milletler Guramasyna agza döwletleriň Doly ygtyýarly wekili hökmünde şol döwletleriň milli bähbitlerini gorap çykyş etdiler. Bäsleşigiň dowamynda halkara gatnaşyklaryndaky meseleler barada pikir alşylyp, teklipler ara alnyp maslahatlaşyldy.
Çykyşlar esasynda türkmen diplomatiýasynyň milli mekdebi bolan Türkmenistanyň Daşary işler ministrliginiň Halkara gatnaşyklary institutynyň Halkara gatnaşyklary we diplomatiýa kafedrasynyň mugallymy Suraý Öwliýagulyýewanyň ýolbaşçylyk etmeginde taýýarlanylan talyplar topary üstünlikli çykyş edip, baýrakly orunlara mynasyp boldular. Bäsleşigiň jemleri boýunça talyplaryň taýýarlan ýörite Kararnamasy, beýleki gatnaşyjylaryň biragyzdan ses bermegi bilen kabul edildi. Şeýle hem, Halkara gatnaşyklary fakultetiniň 1-nji ýyl talyby Rejep Rejepow “Köpçüligiň saýlawy” atly kuboga, şol fakultetiň 3-nji ýyl talyplary — Döwletýar Arçamyradow “Iň gowy wekil” atly kuboga, Kerim Baýmyradow “Iň gowy dilewar” diýen ada eýe boldular we hormat hatlary bilen sylaglandylar.
Döwletýar ARÇAMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.