Bilim ulgamyny ösdürmek ― döwrüň aýdyň ýoly
2024-nji ýylyň 28-nji oktýabrynda Türkmenistanyň Daşary işler ministrliginiň Halkara gatnaşyklary institutynda Halk Maslahatynyň mejlisinde türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň şu ýylyň ahyryna çenli toplumlarda ylym, bilim, medeniýet ulgamlaryny kämilleşdirmek, ýaşlar barada döwlet syýasaty bilen bagly maslahatlary geçirmek boýunça beren tabşyrygyny ýerine ýetirmegiň meselelerine bagyşlanan iş maslahaty geçirildi. Oňa käbir ministrlikleriň we pudaklaýyn dolandyryş edaralarynyň, häkimlikleriň, jemgyýetçilik guramalarynyň, syýasy partiýalaryň, habar beriş serişdeleriniň wekilleri, bilim işgärleri, professor-mugallymlardyr talyp ýaşlar gatnaşdylar.
Mälim bolşy ýaly, 2024-nji ýylyň 24-nji sentýabrynda geçirilen Türkmenistanyň Halk Maslahatynyň mejlisinde Gahryman Arkadagymyz: «Garaşsyz döwletimiziň we agzybir jemgyýetimiziň ösüşi ylym, bilim hem-de medeniýet bilen berk baglydyr» diýip, täze döwrüň amala aşyrylýan özgertmeleri has-da giňeldip, jemgyýetimiziň aň-bilim mümkinçiligini ýokarlandyrmagy talap edýändigini nygtady. Şoňa görä-de, şu ýylyň ahyryna çenli toplumlarda ylym, bilim, medeniýet ulgamlaryny kämilleşdirmek, ýaşlar barada döwlet syýasaty bilen bagly maslahatlary geçirmek teklip edildi. Şeýle hem Milli Liderimiz ýurdumyzy ýokary depginde ösdürmegiň täze tapgyryna badalga berilmegini möhüm wezipeleriň biridigini kesgitläp, Türkmenistanyň Halk Maslahatynyň geljek ýyl geçiriljek mejlisine dürli ugurlar bilen bir hatarda, 2026 — 2052-nji ýyllarda ýokary bilimi ösdürmegiň Strategiýasynyň taslamasyny hödürlemegi teklip etdi. Şonuň ýaly-da, Halk Maslahatynyň mejlisinde hormatly Prezidentimiziň Permany bilen tassyklanan «Türkmenistanda ylym ulgamyny ösdürmegiň 2024 — 2052-nji ýyllar üçin Strategiýasyny» aýratyn bellemek bolar. Bu möhüm resminamany amala aşyrmak boýunça ýerine ýetirilmeli çäreleriň 2024 — 2028-nji ýyllar üçin Meýilnamasynda bolsa göz öňünde tutulýan anyk işler görkezilendir.
Şunuň bilen baglylykda, türkmen diplomatiýasynyň milli mekdebinde geçirilen iş maslahatynda çykyş eden wekiller ylmyň, tehnikanyň örän çalt depginlerde ösmeginiň, täze tehnologiýalaryň döremeginiň bilim edaralarynda okatmagyň usulyýetini kämilleşdirmegi talap edýändigini nygtamak bilen, bu babatda pikir-garaýyşlaryny, anyk teklipleri beýan etdiler. Şunda täze taryhy döwrümizde ýurdumyzda ýaş türkmenistanlylaryň bilim we terbiýe alyp, eziz Watanymyza, halkymyza mynasyp hyzmat etmegi üçin ähli şertleriň döredilýändigi, Gahryman Arkadagymyzyň hem-de hormatly Prezidentimiziň taýsyz tagallalary bilen milli bilim ulgamyny umumy ykrar edilen halkara kadalara we öňdebaryjy tejribelere laýyklykda kämilleşdirmek babatda ägirt uly işleriň alnyp barylýandygy buýsançly bellenildi.
Iş maslahatynda gelip gowşan teklipler giňişleýin ara alnyp maslahatlaşylmak bilen, kabul edilen giň gerimli maksatnamalary, Halk Maslahatynyň mejlisinde öňde goýlan möhüm wezipeleri üstünlikli amala aşyrmakda tutanýerli tagallalaryň zerurdygyna aýratyn üns çekildi. Çünki Milli Liderimiziň nygtaýşy ýaly, biziň esasy wezipämiz halkymyzyň egsilmez güýjüni ýurdumyzy mundan beýläk-de gülledip ösdürmäge gönükdirmekden ybaratdyr.
Iş maslahatyna gatnaşyjylar ylym-bilim ulgamyny döwrebaplaşdyrmaga aýratyn üns berýän türkmen halkynyň Milli Lideri Gahryman Arkadagymyza hem-de hormatly Prezidentimize hoşallyk sözlerini beýan etdiler.
Atamyrat ÝAZWELIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.