Beýik şahyrymyza bagyşlanan döredijilik bäsleşiginiň ýeňijileri
2024-nji ýylyň 10-njy sentýabrynda Türkmenistanyň Jemgyýetçilik guramalarynyň merkezinde Magtymguly adyndaky Ýaşlar guramasynyň Merkezi geňeşi bilen «Garagum» žurnalynyň redaksiýasynyň bilelikde yglan «Müň parasat, müň many, köňülleriň çyragy — pähim-paýhas ummany Magtymguly Pyragy» atly döredijilik bäsleşiginiň ýeňijilerini sylaglamak dabarasy geçirildi. Bu bäsleşikde Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň 3-nji ýyl talyby Atamyrat Ýazweliýew baş baýraga, şeýle hem şol fakultetiň 1-nji ýyl talyby Baýnazar Baýhanow 2-nji baýrakly orna mynasyp boldy.
Akyldar şahyrymyz Magtymguly Pyragynyň doglan gününiň 300 ýyllygy mynasybetli geçirilen bäsleşige dürli kärde zähmet çekýän, okap bilimini artdyrýan ýaşlaryň ençemesi beýik söz ussadyna bagyşlap döreden goşgulary, hekaýalary bilen gatnaşdylar. Bäsleşige hödürlenen eserleriň iň gowulary, şol sanda türkmen diplomatiýasynyň milli mekdebinden ýeňiji bolan talyplaryň hödürlän döredijilik işleri hem «Garagum» žurnalynyň nobatdaky täze sanynda çap edildi.
Bäsleşikde ýeňiji bolanlara Hormat hatlary hem-de gymmat bahaly sowgatlar dabaraly ýagdaýda gowşuryldy. Ýeňiji ýaşlar özleriniň ýürek buýsançlaryny degişli teleýaýlymlarda beýan etmäge mümkinçilik aldylar. Şunda üstümizdäki ýylymyzyň «Pähim-paýhas ummany Magtymguly Pyragy» diýlip atlandyrylmagy şanly ýylymyzyň toý-baýramlara beslenýändiginden habar berýär. Sözüň doly manysynda, bu döredijilik bäsleşigi hem ýaşlary ähli döwürleriň we ömürleriň şahyry hasaplanýan Magtymguly Pyragynyň edebi mirasyndan söz açýan kämil eserleri döretmäge ruhlandyrdy.
Peristan TÖRÄÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.