Beýik başlangyçlar – netijeli hyzmatdaşlyk
Berkarar döwletimiziň täze eýýamynyň Galkynyşy döwründe hormatly Prezidentimiz Arkadagly Gahryman Serdarymyzyň baştutanygynda beýleki ugurlar bilen bir hatarda ylym, bilim ulgamy hem döwrüň talabyna laýyklykda ösdürilip, bu babatda daşary ýurt döwletleri bilen halkara hyzmatdaşlyk ýola goýulýar.
Geljekki türkmen diplomatlary, halkaraçy hünärmenleri kemala getirýän Türkmenistanyň Daşary işler ministrliginiň Halkara gatnaşyklary instituty hem bu günki günde dünýäniň ençeme diplomatik akademiýalary, halkara gatnaşyklaryna ýöriteleşdirilen ýokary okuw jaýlary bilen netijeli hyzmatdaşlyk alyp barýar. Aýratyn-da, goňşy döwletimiz bolan Eýran Yslam Respublikasynda ýerleşýän Syýasy we halkara barlaglar instituty bilen Türkmenistanyň Daşary işler ministrliginiň Halkara gatnaşyklary institutynyň arasynda özara düşünişmek hakynda Ähtnamanyň baglaşylmagy ikitaraplaýyn tejribe alyşmaga giň mümkinçilik döretdi. Muňa mysal edip, 2019-njy ýylda ikitaraplaýyn hyzmatdaşlygy has hem berkitmek maksady bilen, Türkmenistanyň Daşary işler ministrliginiň Halkara gatnaşyklary institutynyň okuw işleri boýunça prorektory Eýran Yslam Respublikasynyň Türkmenistandaky ilçisiniň orunbasary jenap Bahram Taheri bilen duşuşdy.
Duşuşygyň esasy maksady iki ýokary okuw mekdebiniň arasyndaky hyzmatdaşlygy pugtalandyrmakdan ybarat bolup, oňa türkmen diplomatiýasynyň milli mekdebiniň professor-mugallymlary gatnaşdylar.
2021-nji ýylyň 22-nji noýabrynda Türkmenistanyň Daşary işler ministrliginiň Halkara gatnaşyklary institutynyň we Eýran Yslam Respublikasynyň Syýasy we halkara barlaglar institutynyň ýolbaşçylarynyň, professor-mugallymlarynyň, iki ýurduň diplomatlarynyň gatnaşmagynda türkmen-eýran gatnaşyklarynyň ähmiýetine bagyşlanan “tegelek stol” maslahatynyň geçirilmegi iki goňşy döwletiň geljekki halkaraçy hünärmenleri ýetişdirmekdäki hyzmatdaşlygy has hem ileretmäge mümkinçilik döretdi. Ýeri gelende belläp geçsek, Türkmenistanyň Daşary işler ministrliginiň Halkara gatnaşyklary institutynda geljekki halkaraçy hünärmenler üçin ikinji daşary ýurt dili hökmünde pars diliniň hem içgin öwredilmegi, hyzmatdaşlyk alyp barýan ýokary okuw mekdebiniň dilini, medeniýetini öwrenmäge itergi berýär.
Şeýle-de şu ýylyň 22-25-nji maýy aralygynda Türkmenistanyň Bilim ministrliginiň hem-de Türkmenistanyň Daşary işler ministrliginiň Halkara gatnaşyklary institutynyň bilelikde gurnamagynda Merkezi Aziýa, Hazarýaka döwletleriniň, Türkiýe Respublikasynyň, Hytaý Halk Respublikasynyň, şeýle hem Türkmenistanyň ýokary okuw mekdeplerinden talyplaryň arasynda «Halkara gatnaşyklary: parahatçylyk dialogynyň medeniýeti» atly halkara bäsleşik geçirildi. Bu bäsleşige Eýran Yslam Respublikasynyň Syýasy we halkara barlaglar institutynyň ýygyndy topary hem gatnaşyp, baýrakly orunlara mynasyp boldular.
Şasenem MEÝLISOWA,
Türkmenistanyñ Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň III ýyl talyby.