Bäsleşigiň jemi jemlenildi
2023-nji ýylyň 4-nji iýulynda Türkmenistanyň Daşary işler ministrliginiň Halkara gatnaşyklary institutynyň talyplarynyň arasynda yglan edilen “Jeýhun bilen bahry-Hazar arasy” atly referat bäsleşiginiň ýeňijilerini sylaglamak dabarasy geçirildi. Bäsleşik ýurdumyzda Halkara derejesinde giňden belleniljek Magtymguly Pyragynyň 300 ýyllyk toýy mynasybetli Žurnalistikanyň nazaryýeti we amalyýeti kafedrasy hem-de “Ýaş žurnalistler” ylmy-döredijilik gurnagy tarapyndan guraldy. Oňa türkmen diplomatiýasynyň ýokary milli mekdebiniň dürli ugurlarynda, hünärlerinde okaýan talyplar işjeň gatnaşdylar.
Referat bäsleşigine hödürlenen işlerde akyldar şahyryň özboluşly döredijilik dünýäsi, şygyrlarynyň terbiýeçilik ähmiýeti giňişleýin beýan edilýär.
Eminler topary referat işleriniň çeperçiligi, many-mazmuny, pikir yzygiderliligi, öňe sürülýän ideýasy boýunça oňa gatnaşyjylary adalatly bahalandyrdylar. Eminleriň gelen netijesi boýunça institutyň Halkara žurnalistikasy fakultetiniň III ýyl talyby Meýlis Sadykow I orna, Halkara hukugy fakultetiniň I ýyl talyby Oraz Nurlyýew II orna, Halkara žurnalistikasy fakultetiniň Syýasy kommunikasiýa we internet žurnalistikasy fakultetiniň I ýyl talyby Maýsa Aşyrowa III orna mynasyp boldy. Ýeňijiler Hormat hatlary bilen sylaglandylar.
Maýa GURDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň
I ýyl talyby.