“Awaza” milli syýahatçylyk zolagynda geçirilen okuw maslahaty
2024-nji ýylyň 14-20-nji apreli aralygynda Türkmenistanyň Kärdeşler arkalaşyklarynyň Milli Merkeziniň Döwlet edaralarynyň we Saglygy goraýyş işgärleriniň Kärdeşler arkalaşygynyň Geňeşiniň gurnamagynda ýurdumyzda kärdeşler arkalaşyklarynyň işini kämilleşdirmek maksady bilen, pudaklaryň şäher hem welaýat geňeşleriniň başlyklarynyň, hasapçylarynyň, saglygy goraýyş işgärleriniň, kärdeşler arkalaşygynyň ilkinji guramalarynyň başlyklarynyň gaznaçylarynyň, Kärdeşler arkalaşyklarynyň Milli merkeziniň hukuk gözegçileri hem-de işjeň agzalarynyň gatnaşmaklarynda Türkmenistanyň Kärdeşler arkalaşyklarynyň Milli merkeziniň “Awaza” milli syýahatçylyk zolagynda ýerleşýän “Daýanç” sagaldyş we dynç alyş merkezinde “Berkarar döwletiň Kärdeşler arkalaşyklarynyň döwrebap wezipeleri” atly okuw maslahaty geçirildi.
Türkmenbaşy şäherinde “Awaza” milli syýahatçylyk zolagynda bäş günüň dowamynda geçirilen okuw maslahatynyň giňişleýin meýilnamasynyň çäklerinde Arkadagly Gahryman Serdarymyzyň halkymyza sowgat beren “Änew – müňýyllyklardan gözbaş alýan medeniýet” atly kitabynyň biziň elimize gelip gowuşmagyna, 2024-nji ýylyň “Pähim-paýhas ummany Magtymguly Pyragy” ýyly diýlip yglan edilmeginiň ähmiýetine we ýurdumyzyň Kärdeşler arkalaşyklarynyň Türkmenistan döwletimiziň durmuş-ykdysady we medeni taýdan ösüşinde eýeleýän ornuna bagyşlanan birnäçe çäreler guraldy. Okuw maslahatynyň dowamynda Türkmenistanyň kärdeşler arkalaşygynyň maliýe-ykdysady işiniň esasy ugurlary, Türkmenistanyň Kärdeşler arkalaşyklarynyň Maksatnamasy we Tertipnamasy barada giňişleýin durlup geçildi.
Türkmenistanyň Kärdeşler arkalaşyklarynyň işjeň agzalaryny gojaman Hazar deňziniň türkmen kenaryna jemlän okuw maslahatynyň çäklerinde guralan Türkmenbaşy – Gyzylsuw adasy – Türkmenbaşy ugry boýunça “Çarlak” ýolagçy gämisinde deňizde gezelenç, Türkmenistanyň Kärdeşler arkalaşyklarynyň Milli merkeziniň “Daýanç” sagaldyş merkezinde guralan medeni çäreler, tegelek stollar, şeýle-de sport çäreler ähli gatnaşyjylarda ýatdan çykmajak täsir galdyrdy.
Türkmenistanyň Kärdeşler arkalaşygy ýurdumyzyň iri jemgyýetçilik guramalarynyň biridir. Bu gurama özüniň düzümine dürli hünärli we dürli ýaşly müňlerçe agzalary birikdirýär. Türkmenistanyň Kärdeşler arkalaşyklarynyň Milli merkeziniň alyp barýan işlerini ilerletmek we jemgyýetde oňyn durmuş kadalaryny öňe sürmek ugrunda maksatnamalaýyn işleri durmuşa geçirmekde Gahryman Arkadagymyzyň dowamatyny dowam edýän hormatly Prezidentimiziň janynyň sag, ömrüniň uzak bolmagyny, il-ýurt bähbitli, döwlet ähmiýetli işleriniň rowaçlyklara beslenmegini arzuw edýäris.
Enejan ORAZMYRADOWA,
Türkmenistanyň Daşary işler ministrliginiň
Halkara gatnaşyklary institutynyň mugallymy,
Türkmenistanyň KA-nyň ilkinji guramasynyň başlygy.