Aşgabatda Türki döwletleriň Medeniýet hepdeligi açyldy
2023-nji ýylyň 24-nji iýunynda Magtymguly adyndaky milli sazly drama teatrynda Türki döwletleriň Medeniýet hepdeliginiň açylyş dabarasy boldy. Oňa ýurdumyzyň medeniýet ulgamynyň ýolbaşçylary we işgärleri, milli we halkara habar beriş serişdeleriniň wekilleri, TÜRKSOÝ-nyň Baş sekretary, Gazagystanyň, Azerbaýjanyň, Gyrgyzystanyň, Özbegistanyň, Türkiýäniň medeniýet we sungat ussatlary gatnaşdylar.
TÜRKSOÝ-nyň döredilmeginiň 30 ýyllygy mynasybetli 24 — 29-njy iýun aralygynda Aşgabatda geçirilýän Türki döwletleriň Medeniýet hepdeligi medeni-ynsanperwer ulgamdaky halkara hyzmatdaşlygy ösdürmäge we berkitmäge uly goşant goşar. Munuň özi Türkmenistanyň netijeli halkara gatnaşyklary ilerletmekde medeni diplomatiýa uly ähmiýet berýändiginiň nobatdaky beýanydyr.
Halkara çäräniň ýurdumyzda dowam edýän Medeniýet hepdeligi bilen utgaşykly guralmagynda özboluşly many-mazmun bolup, onuň açylyş dabarasy aýratyn ýatda galyjy boldy. Ilkinji nobatda, hormatly Prezidentimiziň Türki döwletleriň Medeniýet hepdeliginiň açylyş dabarasyna gatnaşyjylara iberen Gutlagy uly ruhubelentlik bilen diňlenildi. TÜRKSOÝ-nyň Baş sekretary Sultan Raýewiň çykyşynda hem Aşgabatda bu medeni çäräniň guralmagynyň Bitarap Türkmenistanyň köpugurly hyzmatdaşlygy ösdürmäge çalyşýandygyny, doganlyk we raýdaşlyk ýörelgelerine ygrarlydygyny ýene bir gezek tassyklaýandygy nygtaldy.
Halkara çäräniň açylyş dabarasy türki döwletleriň döredijilik toparlarynyň bilelikdäki konserti bilen dowam etdi. Azerbaýjan Respublikasynyň Döwlet tans toparynyň ýerine ýetiren «Azerbaýjan tansy», Gyrgyz Respublikasynyň sungat ussatlarynyň «Manas» dessanyndan aýdan parçalary, çalan sazlary köpleriň ünsüni özüne çekdi. «Türk dünýäsiniň hazynasyndan» ady bilen türkmen, özbek, azerbaýjan, gazak halk aýdymlaryndan bölekleriň ýerine ýetirilmegi, şonuň bilen birlikde, Gazagystan Respublikasynyň «Saltanat» Döwlet tans toparynyň «Baýramçylyk tansy», Türkiýe Respublikasyndan Jem Gürdalyň we tansçylar toparynyň «Garadeňiz aýdymy», Özbegistan Respublikasynyň «Nowruz» tans toparynyň «Surnaý lezgisi» tansy dabara gatnaşyjylaryň uzak wagtlap ýatlarynda galsa gerek.
«Dehistan» hem-de türki döwletleriň folklor-tans toparlarynyň bilelikde ýerine ýetirmeginde ýaňlanan joşgunly «Küştdepdi» aýdymy aýratyn ýatda galyjy boldy. Dabaraly konsert oňa gatnaşyjylaryň bilelikde ýerine ýetirmeginde «Türkmenistan dost-doganlyk mekany» diýen aýdym bilen jemlendi. Munuň özi ýurtlarymyzyň arasyndaky dost-doganlygyň barha berkeýändiginiň nobatdaky aýdyň nyşany boldy.
Türki döwletleriň Medeniýet hepdeliginiň meýilnamasy uly we baý çäreleri öz içine alýar. Hepdelik üstünlikli dowam edýär.
Atamyrat ÝAZWELIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 1-nji ýyl talyby.