ÄNEW ŞÄHERINIŇ MILLI “AK BUGDAÝ” MUZEÝINE GEZELENÇ
2024-nji ýylyň 3-nji maýynda Türkmenistanyň Daşary işler ministrliginiň Halkara gatnaşyklary institutynyň mugallymlarynyň we talyplarynyň gatnaşmagynda Ahal welaýatynyň Ak bugdaý etrabynyň Änew şäheriniň çäginde ýerleşýän milli “Ak bugdaý” muzeýine gezelenç gurnaldy.
Änew şäheri taryhy medeni ýadygärliklere we arheologik tapyndylara baýdyr. Bu ýerde talyplar ýurdumyzyň çäginden tapylan ilkinji bugdaý dänejiklerini, keramiki toýundan ýasalan önümleri, agaçdan we misden ýasalan dürli görnüşli gap-gaçlary we beýleki dürli taryhy tapyndylary synladylar. Gezelenjiň dowamynda hünärmenleriň ýadygärlikler toplumynyň taryhy, medeni goraghananyň çäklerinde arheologlar tarapyndan üsti açylan tapyndylar hem-de olaryň bu muzeýde ýerleşdirilmegi barada beren gyzykly gürrüňleri ýaşlaryň maglumat goruny örän baýlaşdyrdy. Milli “Ak bugdaý” muzeýine edilen gezelenç ýatda galyjy pursatlara baý boldy.
Bägül MAŞRYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.