Adam hukuklarynyň Ählumumy Jarnamasynyň kabul edilmeginiň 75 ýyllygyna bagyşlanyp geçirilen bäsleşik
Türkmenistan döwletini syýasy, ykdysady, durmuş we medeni taýdan durnukly ösdürmegiň strategiýasyny üpjün etmekde esasy orun adam hukuklaryna degişlidir. Taryhy tejribäniň görkezişi ýaly, jemgyýetiň öňe gidişligiň we erkinligiň ýoly boýunça ösüşi adam hukuklaryny giňeltmek we olaryň mazmunyny baýlaşdyrmak bilen aýrylmaz baglydyr. Jemgyýetçilik ösüşiniň her bir täze basgançagy adam hukuklaryny berjaý etmek we olaryň möçberini artdyrmak bilen baglanyşyklydyr. Adam hukuklary we azatlyklary - bu döwletliligiň kämilligine, onuň demokratik derejesine, hukuk binýadyna, umumadamzat gymmatlyklaryna ygrarlylygyna baha bermegiň baş ýörelgeleriniň biridir.
Şundan ugur alyp, 2023-nji ýylyň 8-nji dekabrynda Türkmenistanyň Daşary işler ministrliginiň Halkara gat naşyklary institutynyň Halkara hukugy we deňeşdirme hukuk öwreniş kafedrasynyň “Ýaş hukukçylar” ylmy gurnagynyň gurnamagynda institutyň Halkara hukugy, Halkara gatnaşyklary we diplomatiýa, Halkara ykdysady gatnaşyklary we Halkara žurnalistikasy fakultetleriniň talyplarynyň arasynda bäsleşik geçirildi. Bäsleşik 3 şertden ybarat bolup, bu şertleri ýerine ýetirmekde talyplar özleriniň bilim we ukyp başarnyklaryny doly açyp görkezdiler. Bu bäsleşige emin agzalary hökmünde Türkmenistanyň Döwlet, hukuk we demokratiýa institutynyň, Türkmenistanyň Adalatçysynyň, şeýle hem Türkmenistanyň Magtymguly adyndaky Ýaşlar guramasynyň Aşgabat şäher geňeşiniň wekilleri gatnaşyp, adalatly baha berdiler. Bäsleşigiň netijeleri boýunça institutymyzyň Halkara gatnaşyklary fakultetinden düzülen talyplar topary ýeňiş gazanmagy başardylar. Bäsleşigiň ahyrynda talyplara hormat hatlary we ýadygärlik sowgatlar gowşuryldy.
Aýlar ŞÜKÜROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.