Adam hukuklary boýunça okuw maslahaty geçirildi
2024-nji ýylyň 3-6-njy dekabry aralygynda Ýewropada Howpsuzlyk we Hyzmatdaşlyk Guramasynyň (OSCE) Aşgabatdaky Merkeziniň guramagynda Magtymguly adyndaky Türkmen döwlet uniwersitetinde “Jenaýat hukuk ulanyşynda adam hukuklary boýunça halkara standartlarynyň berjaý edilişi” atly okuw maslahaty geçirildi. Bu okuw maslahatyna Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, Türkmenistanyň Içeri işler ministrliginiň institutynyň hem-de Daşary işler ministrliginiň Halkara gatnaşyklary institutynyň hukuk we halkara hukugy ugrundan bilim alýan talyplary gatnaşdylar.
Okuw maslahatynyň açylyş dabarasyna ÝHHG-niň Aşgabatdaky Merkeziniň ýolbaşçysy, ilçi Jon MakGregor gatnaşyp, giriş sözi bilen çykyş etdi. Bu okuw maslahatynda adam hukuklary boýunça Moldowa Respublikasyndan gelen halkara bilermenler Ýuriý Lewinte bilen Ion Graur gelip, Adam hukuklarynyň taryhy ösüşi, azatlyklary we hukuklary, jenaýat agtaryş döwründe olara berilýän hukuk kömekler, agtaryş işiniň halkara standartlary, agyr gynamalara garşy göreş we kepillikler, jezasyzlyga garşy göreş, tussaglykda saklamaklygyň tertibi, adamlaryň adalatly kazyýet goragyna bolan hukuklary dogrusynda gürrüň berdiler, şeýle-de talyplardan bu tema boýunça testler alyndy.
Bu okuw maslahaty ÝHHG guramasy tarapyndan adat bolşy ýaly, her ýylyň aýagynda geçirilip, Adam hukuklarynyň Halkara gününe bagyşlanýar. Talyplaryň okuw maslahatyna işjeň gatnaşmagy bu ugurda olaryň bilim we ukyp-başarnyklarynyň ösmegine itergi berdi.
Dürli BALLYÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme
hukuk öwreniş kafedrasynyň
uly mugallymy.