«SALGYTLAR HAKYNDA» TÜRKMENISTANYŇ BITEWI KANUNYNYŇ MAZMUNY BARADA OKUW SAPAGY GEÇIRILDI
2024-nji ýylyň 24-nji aprelinde Türkmenistanyň Daşary işler ministrliginiň Halkara gatnaşyklary institutynda Halkara hukugy we deňeşdirme hukuk öwreniş kafedrasynyň gurnamagynda «Salgytlar hakynda» Türkmenistanyň bitewi Kanunyndan gelip çykýan borçnamalar we kadalaryň mazmuny barada okuw sapagy geçirildi. Okuw sapagyny Türkmenistanyň kazyýet edaralarynda birnaçe ýyl zähmet tejribesi bolan halypa hukukçy Şaguly Haidow alyp bardy. Bu sapaga ýokary okuw mekdebimiziň Halkara hukugy fakultetiniň talyp ýaşlary gatnaşdylar.
Bilşimiz ýaly, bu Bitewi kanun Türkmenistanyň Döwlet býujetine alynýan salgytlaryň ulgamyny, salgyt salmagyň umumy ýörelgelerini, salgytlary tölemek boýunça borçlaryň ýüze çykmagynyň (üýtgemegini, bes edilmegini) esaslaryny we ýerine ýetirmegiň tertibini, salgyt töleýjileriň, salgyt edaralarynyň hukuklaryny we borçlaryny, salgyt gözegçiliginiň görnüşlerini we usullaryny, Türkmenistanyň salgyt kanunçylygynyň bozulandygy üçin jogapkärçiligi, salgyt edaralarynyň çözgütlerinden we olaryň wezipeli adamlarynyň hereketlerinden şikaýat etmek hukugyny belleýär. Şeýle hem, Türkmenistanyň salgyt kanunçylygyna laýyklykda, salgytlary ýatyrýan, salgyt möçberlerini azaldýan, salgyt salmak, salgyt borçlaryny ýerine ýetirmek bilen baglanyşykly ýagdaýlaryň ýüze çykmagy, salgyt kanunçylygynyň bozulandygy baradaky ýüze çykýan meselelere seretmek hem-de Türkmenistanyň hukuk düzgüniniň bozulmagyny ýüze çykarylan ýagdaýynda hereket edýän hukuknamalar dogrusynda giňişleýin gürrüň edildi.
Okuw sapagyň ahyrynda talyp ýaşlar halypa hukukçymyza özlerini gyzyklandyrýan sowallary bilen ýüzlendiler. Şeýle duşuşyklaryň yzygiderli geçirilip durulmagy, ilkinji nobatda ýaşlarda hukuk bilimini, hukuk sowatlylygy we hukuk medeniýetini ösdürmäge hem-de gözýetimini giňeltmäge uly mümkinçilik berýär.
Şamyrat MUHAMMEDOW,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň I ýyl talyby.