Ylymly ýaşlar — Watanyň daýanjy we berkararlygyň binýady
2023-nji ýylyň 7-nji iýunynda Türkmenistanyň Daşary işler ministrliginiň Halkara gatnaşyklary institutynda Ylymlar güni mynasybetli «Ylymly ýaşlar — Watanyň daýanjy we berkararlygyň binýady» atly ylmy-amaly maslahat geçirildi. Oňa Türkmen diplomatiýasynyň milli mekdebiniň, Türkmenistanyň Döwlet, hukuk we demokratiýa institutynyň we ýurdumyzyň başga-da birnäçe ýokary okuw mekdepleriniň wekilleri gatnaşdylar. Ylmy-amaly maslahat umumy mejlisden we 4 sany bölümçeden ybarat boldy. Birinji bölümçe «Daşary syýasatyň ylmy esaslarynyň berkidilmegi», ikinji bölümçe «Ylym — beýik özgerişleriň çeşmesi», üçünji bölümçe «Ykdysadyýeti sanlylaşdyrmak ýurdumyzy ösdürmegiň möhüm guralydyr», dördünji bölümçe «Ylymly-bilimli ýaşlar — ýurdumyzyň röwşen geljegi» diýlip atlandyryldy. Maslahatyň umumy mejlisi Türkmenistanyň Daşary işler ministrliginiň Halkara gatnaşyklary institutynyň rektory J.Gurbangeldiýewiň giriş sözi bilen öz işine başlady. Umumy mejlisde hem-de bölümçelerde çykyş edenler hormatly Prezidentimiziň baştutanlygynda ýurdumyzyň halkara abraýynyň barha ilerleýändigini, döwletimizde ýaşlara ylym bilen meşgullanmak üçin giň mümkinçilikleriň döredilýändigini buýsanç bilen belläp geçdiler. Çykyşlarda Türkmenistanyň halkara arenada öňe sürýän düýpli ylmy seljermelere esaslanýan teklipleriniň hem-de başlangyçlarynyň dünýä döwletleri tarapyndan gyzgyn goldanylýandygy aýdylyp geçildi. Ylmy-amaly maslahatyň ahyrynda oňa gatnaşyjylar ýurdumyzda ýaşlar üçin uly işleri durmuşa geçirýän Gahryman Arkadagymyza, Arkadagly Serdarymyza alkyş sözlerini aýtdylar.
Mätgurban MÄTGURBANOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.