Ýaşlaryň üstünligi — sanly ösüşlere goşant
Ýaşlar syýasatyny üstünlikli durmuşa geçirmek, sanly bilimi ornaşdyrmagyň depginini artdyrmak, ykdysadyýete we beýleki pudaklara innowasion serişdeleri çekmek maksady bilen, ýurdumyzda ylmy-döredijilik bäsleşikleri, taslama sergileri yzygiderli geçirilýär. Önümçilige ylmy işläp taýýarlamalary ornaşdyrmak boýunça amala aşyrylýan maksatnamalaýyn işlere ýaşlar hem işjeň gatnaşýar. Bu babatda sanly tehnologiýalardan kämil baş çykarýan Türkmenistanyň Daşary işler ministrliginiň Halkara gatnaşyklary institutynyň talyp ýaşlarynyň gazanýan üstünlikleri hem aýratyn bellemäge mynasypdyr.
Ýakynda, has takygy, 2023-nji ýylyň 25-nji oktýabrynda ýurdumyzyň umumybilim berýän, ýokary we orta hünär okuw mekdeplerinde bilim alýan ýaşlaryň arasynda geçirilen «Turkmen Cyber.Hack» atly hakaton ylmy-döredijilik bäsleşiginde institutyň talyplary gowy netije görkezip, III baýrakly orna mynasyp boldular. Türkmenistanyň Bilim ministrliginiň meýilnamasyna laýyklykda, Ýagşygeldi Kakaýew adyndaky Halkara nebit we gaz uniwersitetiniň guramagynda geçirilen bu bäsleşikde ýaşlar toparlaýyn esasda bäsleşdiler. Türkmenistanyň Daşary işler ministrliginiň Halkara gatnaşyklary institutynyň Halkara ykdysady gatnaşyklary fakultetiniň öwreniji-mugallymy Meýlis Nepesowyň ýolbaşçylygyndaky toparyň düzüminde institutyň talyplary — Dawut Pürnazarow, Ysmaýyl Berdiýew, Farhat Şaripow, Maksat Taganow, Batyr Sadullaýew dagylar çykyş etdiler. Talyplar sanly ulgamlary guramak we olary dolandyrmak, häzirki zaman sanly gurşawdan başarnykly baş alyp çykmak boýunça özleriniň ussatlygyny görkezdiler.
Şeýle hem institutyň talyplary 2023-nji ýylyň 29-njy noýabrynda ýurdumyzyň ýokary okuw mekdepleriniň talyplarynyň arasynda geçirilen Informatika dersi boýunça geçirilen Açyk internet olimpiadasyna gatnaşyp, üstünlikli çykyş etdiler. Geljekki halkaraçy hünärmenler — Dawut Pürnazarow, Ysmaýyl Berdiýew, Farhat Şaripow, Batyr Sadullaýew, Geldimyrat Tagyýew olimpiadada ýokary işjeňlik görkezdiler. Olara degişli şahadatnamalar gowşuryldy.
Atamyrat ÝAZWELIÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň II ýyl talyby.