Ýangyn howpsuzlyk düzgünlerini berjaý edeliň!
2023-nji ýylyň 15-nji fewralynda Türkmenistanyň Daşary işler ministrliginiň Halkara gatnaşyklary institutynda ýangyn howpundan goranmak we öňüni almak, raýat goranyşy we halas ediş işleri babatda duşuşyk geçirildi. Oňa Aşgabat şäheriniň Polisiýa müdirliginiň 103-nji ýangyn howpsuzlyk bölüminiň uly leýtenanty Ymamguly Kakabaýew, şeýle-de, institutyň baş tehnigy Batyr Aýmämmedow hem-de mugallymlarydyr talyp ýaşlary gatnaşdylar.
Çykyş edenler ýangyn howpunyň öňüni almagyň usullary, ýüze çykan ýagdaýynda ony öçürmegiň tärleri, bu babatda ýangyn söndüriji enjamlary ulanmagyň ýollary barada düşündiriş berdiler hem-de olar iş ýüzünde görkezdiler. Şeýle hem, talyp ýaşlaryň gyzyklanýan sowallaryna giňişleýin jogaplar berdiler.
Ýangyn howpsuzlyk düzgünlerini hem-de raýat goranyşy we halas ediş işlerini ýerine ýetirmek bilen, biz öz gözel tebigatymyzy, onuň ösümlik, haýwanat dünýäsini ýangyn howpundan gorap bileris.
Jahantäç ÖWEZOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.