Türkmenistan bilen Gresiýanyň arasyndaky diplomatik gatnaşyklaryna şanly 30 ýyl
Olimpiýa oýunlarynyň mekany hasaplanylýan Gresiýa Günorta Ýewropada, Balkan ýarymadasynyň günortasynda ýerleşýär. Ol unitar, parlament respublikasy bolup, öz çäginde 13 periferiýa bölünýär.
Türkmenistan döwletimiz bilen Gresiýanyň arasynda diplomatik gatnaşyklar 1992-nji ýylyň 10-njy iýunynda ýola goýuldy. Geçen 30 ýylyň dowamynda diplomatik gatnaşyklarynyň ýola goýulan ilkinji günlerinden başlap, iki döwletiň arasynda energetika, gurluşyk, oba hojalygy we azyk önümleri, maglumat tehnologiýalary we dokma senagaty ýaly ugurlarda ikitaraplaýyn hyzmatdaşlygy ösdürmekde birnäçe işler durmuşa geçirildi. Häzirki wagtda ruhy we medeni gymmatlyklara, deňhukuklylyk, birek-birege hormat goýmak ýörelgelerine esaslanýan ikitaraplaýyn dostlukly gatnaşyklar, özara bähbitli hyzmatdaşlyk mynasyp derejede ösdürilýär hem-de yzygiderli giňeldilýär. Merkezi Aziýada durnuklylygy, howpsuzlygy we hoşniýetli goňşuçylygy berkitmek bilen baglanyşykly Türkmenistanyň bitaraplyk syýasatyna ýokary baha berýän Gresiýa ikitaraplaýyn ykdysady gatnaşyklary pugtalandyrmaga isleg bildirýär. Şeýle hem düzümleýin gurluşyklarda, energetikada we mineral ýaglary gaýtadan işlemekde nou-hau tehnologiýalaryna eýe bolan grek kompaniýalary türkmen kärhanalary bilen hyzmatdaşlygyň gerimini giňeltmegi göz öňünde tutýarlar.
Şeker HUDAÝBERENOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.