TÜRKMEN-ITALÝAN HYZMATDAŞLYGY BARHA PUGTALANÝAR
Berkarar döwletiñ täze eýýamynyň Galkynyşy döwründe Gahryman Arkadagymyzyň, Arkadagly Gahryman Serdarymyzyň saýasynda ýurdumyz dostluk we özara hormat goýmak ýörelgelerine esaslanýan köpýyllyk döwletara gatnaşyklary alyp barýar. Türkmenistan Garaşsyzlyk ýyllary içinde 150-den gowrak döwlet bilen diplomatik gatnaşyklary ýola goýdy. Şol döwletleriň biri hem Italiýa Respublikasydyr. Geçen taryhy döwürde ýurdumyz italýan kompaniýalary bilen bilelikdäki işiň, Italiýanyň söwda we senagat birleşikleri bilen dialogyň baý tejribesini toplady. Munuň aýdyň mysaly hökmünde köp ýyllardan bäri italýan işewürleri Türkmenistanyň nebitgaz toplumynda, myhmanhana ulgamynda iş alyp barýarlar, gurluşyk we söwda ulgamlarynda birnäçe taslamalary amala aşyrýarlar. “Eni” öňdebaryjy italýan nebit kompaniýasy bilen hyzmatdaşlyk ýola goýuldy. Ol Türkmenistanda 2008-nji ýyldan bäri iş alyp barýar. Italýan kompaniýalary Türkmenistanyň nebitgaz pudagy üçin enjamlary we serişdeleri getirýärler. 2024-nji ýylda “ProBusiness”, “Chimec” we “Comair” kompaniýalary bilen hem şertnamalar baglaşyldy. Şunuň bilen birlikde, Türkmenistanyň hem-de Italiýanyň mümkinçilikleri has giňdir.
Ýaňy ýakynda hormatly Prezidentimiz Italiýa Respublikasyna saparynyň çäklerinde türkmen-italýan işewürlik maslahatyna gatnaşdy. Hormatly Prezidentimiz bu maslahatyň dowamynda durnukly energetika, dokma senagaty, ulag ulgamlarynda türkmen-italýan hyzmatdaşlygynyň amala aşyrylmagy barada nygtap, Türkmenistan öz önümleriniň Italiýa iberilmegini diwersifikasiýalaşdyrmak, taýýar önümlere aýratyn üns bermek arkaly olaryň görnüşlerini ep-esli giňeltmek mümkinçiliklerine eýe bolup durýandygy hakynda çykyş etdi. Şeýle-de, hormatly Prezidentimiz iki ýurduň arasyndaky söwda gatnaşyklary hem anyk talaplara hem-de isleglere, özara mümkinçiliklere, uzakmöhletli işewürlik ylalaşyklaryna esaslanýandygy we Italiýanyň işewür toparlary bilen ýurdumyzyň arasynda söwda-ykdysady hem maýa goýum gatnaşyklaryny ýola goýmagyň hem-de pugtalandyrmagyň ýolunda möhüm ädim hökmünde garalýandygy hakynda aýtdy.
Türkmen-italýan işewürlik maslahatynyň barşynda: Dokma senagatynda hyzmatdaşlyk etmek barada Türkmenistanyň Dokma senagaty ministrligi bilen Italiýanyň «Marzoli Machines Textile S.M.L.» kompaniýasynyň arasynda özara düşünişmek hakynda Ähtnama; Dokma senagatynda hyzmatdaşlyk etmek barada Türkmenistanyň Dokma senagaty ministrligi bilen Italiýanyň «Itema S.p.A» kompaniýasynyň arasynda özara düşünişmek hakynda Ähtnama; Dokma senagatynda hyzmatdaşlyk etmek barada Türkmenistanyň Dokma senagaty ministrligi bilen Italiýanyň «MCS dyeing & finishing machinery» kompaniýasynyň arasynda özara düşünişmek hakynda Ähtnama; Dokma senagatynda hyzmatdaşlyk etmek barada Türkmenistanyň Dokma senagaty ministrligi bilen Italiýanyň «Savio Maccine Tessili S.p.A» kompaniýasynyň arasynda özara düşünişmek hakynda Ähtnama gol çekildi. Bu wakalar biziň halkymyzyň geljekde has ynamly zähmet üstünliklerine ýetmeklerine itergi berer.
Şeýle-de, Türkmenistanyň hemişelik Bitaraplygynyň şanly 30 ýyllygynyň giňden bellenilýän ýylynda Italiýa Respublikasynyň Rim şäherinde “Türkmenistanyň gadymy siwilizasiýalary” atly arheologik serginiň geçirilmegi aýratyn many-mazmuna eýe boldy. Biziň Bitaraplyk syýasatymyzdan gelip çykýan aýdyň maksatlar dünýä halklarynyň arasynda dostlukly gatnaşyklary berkitmäge, medeni hyzmatdaşlygy has-da ösdürmäge uly ýardam berýär.
Maral ORAZGYLYJOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy we deňeşdirme hukuk öwreniş kafedrasynyň mugallym-öwrenijisi.