Türkmen-gyrgyz hyzmatdaşlygyna bagyşlanan tegelek stol
2023-nji ýylyň 30-njy oktýabrynda Türkmenistanyň Daşary işler ministrliginiň Halkara gatnaşyklary instituty bilen Gyrgyz Respublikasynyň Daşary işler ministrliginiň K.Dikambaýew adyndaky Diplomatik akademiýasynyň arasynda Bişkek şäherinde Diplomatik akademiýanyň binasynda türkmen-gyrgyz hyzmatdaşlygyna bagyşlanan tegelek stol geçirildi.
Bu tegelek stol 2014-nji ýylyň 11-nji noýabrynda gol çekilen Türkmenistanyň Daşary işler ministrliginiň Halkara gatnaşyklary instituty bilen Gyrgyzystanyň Daşary işler ministrliginiň K.Dikambaýew adyndaky Diplomatik akademiýasynyň arasyndaky özara düşünişmek hakynda Ähtnamanyň çäginde gurnaldy. Bu resminama birnäçe ýyllaryň dowamynda daşary syýasat, halkara gatnaşyklary we diplomatiýa ugurlary boýunça hünärmenleri taýýarlaýan ýokary okuw jaýlarynyň arasynda tejribe alyşmaga uly mümkinçilik berdi.
Duşuşyga türkmen diplomatiýasynyň milli mekdebi bolan Türkmenistanyň Daşary işler ministrliginiň Halkara gatnaşyklary institutynyň ylmy işler boýunça prorektory, t.y.k. B.Mätliýew, Halkara gatnaşyklary we diplomatiýa kafedrasynyň professory, s.y.d. Ö.Muhammetberdiýew hem-de Türkmenistanyň Gyrgyz Respublikasyndaky (Bişkek ş) Ilçihanasynda önümçilik tejribeligini geçýän Halkara gatnaşyklary fakultetiniň V ýyl talyby M. Bagyrowa we Halkara hukugy fakultetiniň V ýyl talyby H.Döwletnazarowa, şeýle hem K.Dikambaýew adyndaky Diplomatik akedemiýanyň professor-mugallymlary, talyp ýaşlary gatnaşdylar.
TDIM-niň HGI-nyň ylmy işler boýunça prorektory B.Mätliýewiň ýolbaşçylygyndaky türkmen wekiliýetiniň saparynyň dowamynda bu akademiýanyň rektory A.Kylyçew bilen mundan beýläkki hyzmatdaşlyk we tejribe alyşmak boýunça geljegi uly ugurlar ara alnyp maslahatlaşyldy.
Tegelek stoluň ahyrynda türkmen tarapy bilen talyplaryň arasynda jikme-jik pikir alyşma söhbedi geçirildi hem-de gatnaşyjylara Türkmenistanyň Daşary işler ministrliginiň Halkara gatnaşyklary instituty barada wideorolik görkezildi.
Maral BAGYROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň V ýyl talyby.
Bu barada şu ýerde hem okap bilersiňiz: