TELEKEÇILIK PUDAGY ÖSÜŞIŇ AÝDYŇ ÝOLLARYNDA
Berkarar döwletiň täze eýýamynyň Galkynyşy döwründe Arkadagly Gahryman Serdarymyzyň ýolbaşçylygynda Garaşsyz, baky Bitarap Watanymyz Türkmenistan döwletimiz günsaýyn gülläp ösýär. Her bir halkyň bagtyýar hem bolelin durmuşda ýaşamagy üçin, döwletiň kuwwatly ykdysady ulgamynyň bolmagy bolsa zerur bolup durýar. Döwletimiz ykdysady ulgamyň has-da kuwwatlanmagy üçin erkin bazar ykdysadyýetini ösdürmäge uly üns berýär. Erkin bazar ykdysadyýetinde bolsa telekeçileriň tutýan orny uludyr. Döwletimiz tarapyndan hemmetaraplaýyn goldanylýan telekeçiler hem özleriniň ukyp-başarnyklaryny, güýç-gaýratlaryny gaýgyrman zähmet çekýärler.
Hemişelik Bitarap Türkmenistan döwletimiz oňyn Bitaraplyk syýasatyna esaslanyp, dünýäniň birnäçe döwletleri bilen syýasy, ykdysady we medeni gatnaşyklary alyp barýar. Garaşsyzlygymyzy gazanan ilkinji günlerimizden başlap, döwletimiz «Açyk gapylar» syýasatyny yglan etdi. Bu syýasat daşary ýurt maýadarlaryna ýol açmak, bilelikdäki kärhanalary gurmak işine çekmek arkaly milli ykdysadyýetimize häzirki zaman tehnologiýalaryny ornaşdyrmak we dünýä bazarlarynda bäsleşige ukyply önümleri öndürmekdir. «Açyk gapylar» syýasatynyň yglan edilmegi bilen «Daşary ykdysady iş hakynda», «Türkmenistanda maýa goýum işi hakynda» kanunlary kabul edildi, ýagny daşary ýurt kompaniýalarynyň Türkmenistanda işlemekleri üçin hukuk giňişligi döredildi, olaryň milli ykdysadyýetimize maýa goýumlarynyň goraglylygy kepillendirildi. Şol döwürden bäri geçen ýyllaryň dowamynda milli ykdysadyýetimiz yzygiderli we durnukly ýagdaýda gülläp ösýär. Ýeri gelende bellesek, 2023-nji ýylda ýurdumyzda jemi içerki önümiň ösüş depgini 6.2 göterime barabar boldy. Häzirki wagtda türkmen telekeçileriniň kärhanalarynda öndürilýän önümler diňe bir içerki bazary kanagatlandyrmak bilen çäklenmän, eýsem daşary ýurtlaryň hem ençemesine eksport edilýär. Milli ykdysadyýetimizi diwersifikasiýa ýoly bilen ösdürmegiň çäklerinde daşary ýurtlardan getirilýän önümleriň ornuny tutýan harytlaryň möçberini köpeltmek, elektron senagaty döretmek boýunça maksatnamalar netijeli durmuşa geçirilýär. Türkmen telekeçileri döwletiň azyk garaşsyzlygynyň pugtalandyrylmagyna ýardam berýärler we öňde goýlan belent maksatlara ýetmeklik üçin arman-ýadaman zähmet çekýärler. Häzirki wagtda türkmen telekeçileriniň gazanan üstünliklerini dünýäniň ençeme döwletlerinde geçirilen halkara sergilerde görkezilmegi we daşary ýurtlar bilen söwda-ykdysady hyzmatdaşlygyň ösdürilmegi üçin uly mümkinçilikler döredilýär. Şeýle mümkinçilikleriň biri hem ýakynda Beýik Britaniýada azyk we içgi senagatyna degişli «Food and Drink Event (IFE) 2024» halkara serginiň işine türkmen wekilleriniň gatnaşmagydyr. Serginiň 2024-nji ýylyň 25-27-nji marty aralygynda London şäherinde ýerleşýän «ExCel» sergiler merkezinde geçirilmegine garaşylýar. Bu halkara sergi barada bellesek, bu sergä bölek söwda, azyk hyzmatlary, myhmanhana işewürligi, lomaý söwda, paýlaýyş (distribýutorlyk işleri), import we eksport pudaklaryndan 27000-den gowrak alyjy bilen işleşmek isleýän 1500-den gowrak kompaniýanyň gatnaşmagyna garaşylýar. Bu sergide «Täze önümleriň teatry» atly ýörite bölek ýer kesgitlenen. Bu teatr aşpezlere, distribýutorlara gönükdirilen. Olar özleriniň täze önümlerini görkezmek, taýýarlanyşyny öwretmek, beýleki aşpezler bilen tanyş bolmak we özleriniň tejribelerini paýlaşmak üçin aýratyn zolak bolup durýar. Mundan başga-da bu sergide diňe bir aşpezler däl, eýsem aşhana dizaýnerleri hem üýşüp birek-birekden pikir alyşýarlar. Bu sergide myhmanhana işini ýöredýän telekeçileriň duşuşygy hem geçiriler. Bu duşuşykda, esasan, myhmanhana işiniň geljegi hakda, telekeçiler özara pikir alyş-çalşygyny hem-de myhmanhana işini geljekde haýsy usullar bilen alyp barylmalydygy hakynda maslahat ederler. Şeýle halkara sergilere türkmen telekeçileriniň hem çagyrylmagy Türkmenistan Watanymyzda öndürilýän önümlere halkara jemgyýetçiliginiň uly gyzyklanma bildirilip, döwletimiziň halkara abraýynyň yzygiderli ýokarlanandygynyň aýdyň subutnamasydyr.
Döwran ÝOWBAGŞYÝEW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň I ýyl talyby.