Talyplyga ýeten taplanan zehin
«Halkyň Arkadagly zamanasy» ýylynda maňa Türkmenistanyň Daşary işler ministrliginiň Halkara gatnaşyklary institutynyň talyby bolmak bagty miýesser etdi. Bu bagtly pursat meniň durmuşumda iň naýbaşy wakalaryň biridir. Men bu arzyly ýokary okuw mekdebi barada eşiden günümden bäri bu ýere okuwa girmegi arzuw edip gelýärdim. Şol arzuwyma ýetmek üçin hem heniz başlangyç synplarda okaýan mahallarym iňlis, rus, fransuz dillerini öwrenip başladym. Berkarar döwletiň täze eýýamynyň Galkynyşy döwründe hormatly Prezidentimiz Serdar Berdimuhamedowyň parasatly baştutanlygynda ýurdumyzda ýaşlar hakynda edilýän aladalar özüniň oňyn netijelerini berýär. Biziň okap, bilim alyp, dürli derejelerdäki bäsleşiklere gatnaşyp, öz ukyp-başarnyklarymyzy açyp görkezmek üçin uly mümkinçilikler döredilýär. Arkadagly Serdarymyzyň we Gahryman Arkadagymyzyň döredip beren bu mümkinçiliklerinden peýdalanyp, men hem döwlet we halkara bäsleşiklerine gatnaşyp, baýrakly orunlary almagy başardym. 6-njy synpdan başlap men matematika dersini düýpli okap, bu ugur boýunça olimpiadalara gatnaşyp gelýärin. Şolaryň hatarynda 2020-nji ýylda Eýran Yslam Respublikasynda geçirilen VII Geometriýa olimpiadasynda kümüş, 2021-nji ýylda ýene şol olimpiadada bürünç, 2022-nji ýylda Azerbaýjan Respublikasynda geçirilen I Lotfi Zadeh halkara olimpiadasynda matematika dersi boýunça kümüş, Adygeýa Respublikasynda geçirilen VII Kawkaz Matematika olimpiadasynda bürünç, mundan başga-da, «UNIPO» halkara taslama bäsleşiginde programmirleme dersi boýunça 2021-nji ýylda bürünç we fizika dersi boýunça 2022-nji ýylda kümüş medala mynasyp bolandygymy belläp geçesim gelýär. Şeýle-de şu ýylda «Altyn asyryň altyn zehinleri» atly taslama bäsleşiginiň döwlet tapgyrynda takyk ugry (matematika) boýunça I orny, Seýitnazar Seýdi adyndaky Türkmen döwlet mugallymçylyk institutynyň guramagynda geçirilen «Okuwçylaryň Matematikadan Internet Olimpiadasynda» III orny eýelemegi başardym. Gazanan üstünliklerim we ös saýlan hünärim boýunça zerur bilimleri yhlasly özleşdirendigim giriş synaglarynda maňa uly goltgy berdi.
Matematika ykdysadyýetiň özeni bolsa gerek. Bu dersi oňat bilýänim üçin hem men ykdysadyýet fakultetini saýlap aldym. Men öz arzuwyma ýetenime diýseň begenýärin. Saýlap alan ugrum boýunça gowy okap, geljekde Watanymyza, ilimize, hormatly Prezidentimize wepaly boljak ýokary derejeli hünärmen bolup ýetişmek meniň indiki esasy maksadymdyr. Ýaşlaryň ylymly, bilimli, döwrebap tehnologiýalardan kämil baş çykaryp bilýän hünärmenler bolup ýetişmekleri üçin ähli tagallalar edýän Arkadagly Serdarymyza tüýs ýürekden sagbolsun aýdýaryn. Goý, hormatly Prezidentimiziň jany sag bolsun, alyp barýan döwletli işleri barha rowaç alsyn.
Orazmyrat SÄHETMYRADOW,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary fakultetiniň
I ýyl talyby.