Talyp ýüregimiň buýsanjy
Berkarar döwletiň täze eýýamynyň Galkynyşy döwründe Gahryman Arkadagymyzyň, Arkadagly Serdarymyzyň parasatly baştutanlygynda ýurdumyz bedew bady bilen ösüşlerden ösüşlere beslenýär. Ylym-bilim ulgamynda hem täze sepgitlere ýetilýär. Bu ugurda ýurdumyzda her ýylda gurlup ulanylmaga berilýän dünýä ülňülerine laýyk gelýän ylym-bilim ojaklary alnyp barylýan özgertmelere şaýatlyk edýär. 2023-nji ýylyň 1-nji sentýabrynda Arkadag şäherinde orta hünär okuw mekdepleriniň açylmagy, paýtagtymyzda we welaýatlarda ýokary okuw mekdepleriniň täze binalar toplumynyň düýbüniň tutulmagy biz ýaş nesillere öz bilimlerimizi dürli ugurlarda kämilleşdirmäge ýardam edýär. Mundan başga-da ýaş nesilleriň öz ukyp-başarnyklaryny açyp görkezmek üçin bäsleşiklerdir olimpiadalar geçirilýär. Şeýle bäsleşikleriň biri hem Türkmenistanyň Daşary işler ministirliginiň Halkara gatnaşyklary institutynyň Ýaş diplomatlar mekdebi tarapyndan gurnalýan “Parahatçylygyň ýaş çaparlary” atly akyl-paýhas bäsleşigidir. Maňa-da bu bäsleşigiň II möwsüminiň saýlama tapgyrlaryndan üstünlikli geçip ýarym final oýnuna çenli baryp ýetmek miýesser etdi. Bu bäsleşik maňa türkmen halkynyň gadymy taryhy we türkmen diplomatiýasynda yz goýan taryhy şahsyýetleriň ömür ýollary hakynda gymmatly maglumatlary öwrenmäge mümkinçilik berdi. Aýratyn-da bäsleşik türkmen diplomatiýasynyň gadymy däp-dessurlaryna laýyklykda alnyp barylmagy, biz ýaşlary watansöýüjilik ruhunda terbiýelemekde uly ähmiýete eýe bolup durýar.
2023-nji ýylyň 1-nji sentýabrynda “Bilimler we talyp ýaşlar güni” dabaraly ýagdaýda bellenilip geçildi. Bu täze okuw ýylynyň başlangyjy meniň durmuşymda ýatdan çykmajak waka öwrüldi. Maňa Türkmenistanyň Daşary işler ministirliginiň Halkara gatnaşyklary institutynyň bagtyýar talyby bolmak miýesser etdi. Bu bolsa meniň türkmen diplomatiýasynyň taryhyny we usullaryny öwrenmäge bolan höwesimi has-da artdyrdy. Bize bilim almaga, döredijilik zehinimizi açyp görkezmäge giň mümkinçilikleri döredip berýän Gahryman Arkadagymyzyň, Arkadagly Serdarymyzyň janlary sag, ömürleri uzak bolsun! Tutýan tutumly işleri hemişe rowaçlyklara beslensin!
Taňryguly GELDIMÄMMEDOW,
Türkmenistanyň Daşary işler ministirliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.