Talyp boldum, yhlasym myrat tapdy!
Arkadagly Serdarymyzyň baştutanlygynda döwletimizde ýaşlara uly ynam bildirilýär. Ýurdumyzda ýaş nesilleriň kämil şahsyýetler bolup ýetişmekleri ugrunda toplumlaýyn işler durmuşa geçirilýär. Bu günki gün şol beýik işlerden ruhlanan türkmen ýaşlary rowaçly maksatlarynyň myradyna gowuşýar.
2023-nji «Arkadag Serdarly bagtyýar ýaşlar ýylynda» talyp atly buýsançly ada mynasyp bolmak maňa hem miýesser etdi. Bu ýyl meniň durmuşumda ýatdan çykmajak wakalara baý ýyllaryň biri boldy. Çünki men tamamlanan okuw ýylynda «Altyn asyryň altyn zehinleri» atly ders bäsleşiginiň döwlet tapgyrynda biologiýa dersi boýunça III orna hem-de şol bäsleşikleriň çäginde geçirilýän taslama (ylmy döredijilik) bäsleşiginde biologiýa dersinden höweslendiriji orny eýelemegi başardym.
S.A.Nyýazow adyndaky Türkmen oba hojalyk uniwersiteti tarapyndan geçirilen biologiýa dersi boýunça bäsleşikde II orna, Seýitnazar Seýdi adyndaky Türkmen döwlet mugallymçylyk institutynyň gurnamagynda 11-nji synp okuwçylaryň arasynda geçirilen ekologiýa dersi boýunça bäsleşikde I orna, şol ders boýunça Türkmenistanyň Daşary işler ministrliginiň Halkara gatnaşyklary institutynyň gurnamagynda 10-11-nji synp okuwçylaryň arasynda geçirilen bäsleşikde I orna mynasyp boldum. Mundan başga-da, Türkmenistanyň Bilim ministrliginiň, Türkmenistanyň Magtymguly adyndaky Ýaşlar guramasynyň Merkezi Geňeşiniň, Türkmenistanyň Parahatçylyk Gaznasynyň müdirýetiniň hem-de «Güneş» žurnalynyň redaksiýasynyň bilelikde gurnamagynda «Parahatçylyk: çagalaryň sesi» atly döredijilik bäsleşiginde Hormat haty bilen sylaglandym. Ýurdumyzda ýaş nesiller üçin halkara derejesindäki bäsleşiklere-de gatnaşmaga giň mümkinçilikler döredilýär.
Men hem şol mümkinçiliklerden peýdalanyp, 2022-nji ýylda geçirilen Halkara Mendel olimpiadasynda bürünç medala mynasyp boldum. «Soňky jaň» dabarasy hem-de Aşgabat şäheriniň güni mynasybetli geçirilen dabarada hormatly Prezidentimiziň Şa serpaýyna mynasyp bolmagym meniň göwün guşymy ganatlandyrdy. Men hem öz gezegimde, mundan beýläk-de bilimimi, yhlasymy gaýgyrman, Watanymyza gerekli, ilhalar ynsan bolup ýetişjekdigime sizi ynandyrmak isleýärin. Türkmen ýaşlarynyň nurana geljegi üçin uly tagallalar edýän türkmen halkynyň Milli Lideri Gahryman Arkadagymyzyň, Arkadagly Serdarymyzyň janlary sag, ömürleri uzak bolsun, döwletli işleri hemişe rowaçlyklara ýar bolsun!
Sahydöwlet Hümmetjumaýew,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň I ýyl talyby.