Institutymyzyň talyplary — halkara olimpiadanyň ýeňijileri
2023-nji ýylyň 22-nji dekabrynda Türkmenistanyň Bilim ministrliginiň goldawy bilen Döwletmämmet Azady adyndaky Türkmen milli dünýä dilleri institutynda rus dili boýunça geçirilen Halkara internet olimpiadasynyň ýeňijilerini we baýrakly orunlary eýelänleri sylaglandyryş dabarasy geçirildi.
2023-nji ýylyň 6-7-nji dekabrynda geçirilen internet olimpiada Türkmenistanda «Arkadag Serdarly bagtyýar ýaşlar» şygary bilen tamamlanyp barýan 2023-nji ýylda ýaşlaryň üstünliklerini we ýeten derejelerini artdyran ýene bir möhüm waka boldy. Bäsleşigiň netijeleri boýunça 50 ýeňiji kesgitlendi.
Ýeňijileriň arasynda Türkmenistanyň we daşary ýurtlaryň birnäçe ýokary okuw mekdeplerinden, ýagny Seýitnazar Seýdi adyndaky Türkmen döwlet mugallymçylyk institutyndan, Türkmenistanyň Daşary işler ministrliginiň Halkara gatnaşyklary institutyndan, Döwletmämmet Azady adyndaky Türkmen milli dünýä dilleri institutyndan, Magtymguly adyndaky Türkmen döwlet uniwersitetindan, Myrat Garryýew adyndaky Türkmenistanyň Döwlet lukmançylyk uniwersitetinden, Türkmen döwlet binagärlik-gurluşyk institutyndan, Halkara ynsanperwer ylymlary we ösüş uniwersitetinden, Türkmenistanyň Milli howpsuzlyk institutyndan, Türkmenistanyň Oguz han adyndaky Inžener-tehnologiýalar uniwersitetinden, Türkmenistanyň Döwlet energetika institutyndan, A.Ž.Myrsabekow adyndaky Oş (Gyrgyzystan) döwlet mugallymçylyk uniwersitetinden, I.Altynsarin (Gazagystan) adyndaky Arkalyk mugallymçylyk institutyndan, Özbegistanyň Döwlet dünýä dilleri uniwersitetinden, Samara döwlet sosial-mugallymçylyk uniwersitetinden, Nižnyý Nowgorodyň N.I.Lobaçewskiý adyndaky Döwlet uniwersitetinden, Naberežnyýe Çelny döwlet mugallymçylyk uniwersitetinden (Russiýa) talyplar gatnaşdy.
Hususan-da, türkmen diplomatiýasynyň milli mekdebinden Halkara gatnaşyklary fakultetiniň talyplary Muhammet Haýdarow, Batyr Esenow, Halkara ykdysady gatnaşyklary fakultetiniň talyplary Ýulduz Astanowa, Ogulbagt Ataýewa, Selbi Täşliýewa, Halkara žurnalistikasy fakultetiniň talyplary Muhammetmyrat Narmedow, Annaberdi Kaşaňow, Ajaýyp Nobatowa, Döwletgeldi Öwezgeldiýew dagy I orna, Halkara gatnaşyklary fakultetiniň talyby Aýgül Meredowa, Halkara ykdysady gatnaşyklary fakultetiniň talyby Mahym Kakaýewa dagy II orna, Halkara gatnaşyklary fakultetiniň talyplary Oguzhan Piriýew, Nurmuhammet Annamyradow, Nazar Ataýew, Şatlyk Hemraýew, Halkara hukugy fakultetiniň talyby Söýün Allaýew, Halkara ykdysady gatnaşyklary fakultetiniň talyplary Gülöwser Rejepowa, Mähriban Mämmedowa, Halkara žurnalistikasy fakultetiniň talyby Seýran Sopyýew dagy bolsa III orna mynasyp boldular. Olimpiadanyň ýeňijilerine Döwletmämmet Azady adyndaky Türkmen milli dünýä dilleri institutynyň adyndan degişli derejeli diplomlar gowşuryldy.
Olimpiada ýaşlara rus dili boýunça intellektual we döredijilik ukyplaryny görkezmäge mümkinçilik berdi, şeýle hem talyplaryň gepleýiş, ýazuw we aragatnaşyk endiklerini ýokarlandyrmaga bolan höwesini artdyrdy. Mundan başga-da, bu bäsleşik ylym we bilim pudagynda halkara hyzmatdaşlygyň giňelmegine we dünýäniň dürli künjeklerinden ýokary okuw mekdepleriniň wekilleriniň arasynda dostlukly gatnaşyklaryň pugtalandyrylmagyna goşant goşdy.
Annaberdi KAŞAŇOW,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň III ýyl talyby.