Hazar deňzi durnukly ösüş we dolandyryş atly 8-nji halkara okuw maslahaty
Şu gün Türkmenistanyň Prezidenti Serdar Berdimuhamedowyň gol çeken Kararyna laýyklykda, 2022-nji ýylyň 16 – 27-nji maýy aralygynda Türkmenistanyň Daşary işler ministrliginiň, Halkara Ummanlar Institutynyň (IMO) we Türkmenistanyň Hazar Deňzi Institutynyň bilelikde gurnamagynda geçirilen «Hazar deňzi – durnukly ösüş we dolandyryş» atly sekizinji halkara okuw maslahaty öz işini tamamlady.
Bu halkara okuw maslahatynyň tamamlanmagy mynasybetli geçirilen dabara Türkmenistanyň Hazar deňzi institutynyň direktory Myrat Atajanow, «Hazar deňzi – durnukly ösüş we dolandyryş» atly sekizinji okuw maksatnamasynyň direktory Ýuriý Alýunin, Dr. Parwin Farşçi, Amangylyç Babaýew, Dr. Emil Esenow, sanly ulgam arkaly Halkara Ummanlar Institutynyň Hormatly Prezidenti Dr. Awni Behram, Halkara Ummanlar Institutynyň Prezidenti Dr. Mahin Fagfouri we Halkara Ummanlar Institutynyň Dolandyryş direktory Antonella Wassalo we okuw maslahatynyň diňleýjileri hökmünde Türkmenistanyň Hazar deňzi institutynyň wekili Amangül Nuryýewa, Türkmenistanyň Adalat ministrliginiň wekili Leýli Saryýewa, Türkmenistanyň maliýe we ykdysadyýet ministrliginiň wekili Nurjahan Meredowa, “Türkmennebit” Döwlet konserniniň wekili Begençmyrat Myradow, “Türkmengaz” Döwlet konserniniň wekili Ahal Gurbanýazow, “Türkmendeňizderýaýollary” agentliginiň wekili Eziz Çaryýew, ÝUNESKO-nyň işleri barada Türkmenistanyň Milli toparynyň Sekretariatynyň wekili hökmünde Türkmenistanyň Daşary işler ministrliginiň Halkara gatnaşyklary institutynyň 4-nji ýyl talyby Jemal Rematullaýewa, Eýran Yslam Respublikasynyň Türkmenistandaky Ilçihanasynyň wekili Şeýda Asgharzadeh we Gazagystan Respublikasynyň Türkmenistandaky Ilçihanasynyň wekili Dastan Suleimenow dagylar gatnaşdylar.
Halkara okuw maslahatynyň gutardyş dabarasynyň dowamynda topar tarapyndan taýýarlanan “Hazar deňzinde we kenarýaka sebitlerde syýahatçylygy ösdürmegiň strategik meýilnamasy” atly işi barada pikir alşyldy we jemleýji dialog gurnaldy.
Dabaranyň ahyrynda diňleýjilere «Hazar deňzi – durnukly ösüş we dolandyryş» atly sekizinji halkara okuw maksatnamasyny üstünlikli tamamlandygy hakynda şahadatnama we Halkara Ummanlar Institutynyň nyşany gowşuryldy.
Jemal REMATULLAÝEWA,
Türkmenistanyň Daşary işler ministrliginiň
Halkara gatnaşyklary institutynyň
Halkara gatnaşyklary fakultetiniň
IV ýyl talyby.