HALKARA TEJRIBE – KÄMILLIGE TARAP
– Ajaýyp zamanamyzda ýurdumyzyň bilim ulgamyna uly üns berilýär. 2013-nji ýyldan bäri Türkmenistanyň Daşary işler ministrliginiň Halkara gatnaşyklary institutynyň 5-nji ýyl talyplary döwletimiziň daşary ýurtlardaky diplomatik wekilhanalarynda, konsullyk edaralarynda we halkara guramalarynyň ýanyndaky hemişelik wekilhanalarynda on iki hepdelik önümçilik tejribeligini geçýärler. Maňa hem Türkmenistanyň Gazagystan Respublikasyndaky ilçihanasynda önümçilik tejribeligini geçmek bagty miýesser etdi. Tejribelik döwrümde diplomatik wekilhananyň alyp barýan işleri we hukuk esaslary, türkmen-gazak gatnaşyklarynyň köptaraplaýyn ugurlary, şeýle hem ýurdumyzyň parahatsöýüjilik ýörelgelerine esaslanýan daşary syýasat strategiýasynyň möhüm ugurlary bilen giňişleýin tanyşdym. Astana şäherinde geçirilen okuw maslahatlaryna, konferensiýalara hem-de ilçihananyň wekilleri bilen bilelikde resmi duşuşyklara gatnaşmagym hünärime bolan söýgimi has-da artdyrdy. Gülläp ösýän döwrümizde beýik işleri durmuşa geçirýän, biz – ýaşlara okamaga, öwrenmäge, şeýle hem, halkara derejesinde tejribelik geçmegimize uly mümkinçilikleri döredip berýän Milli Liderimize hem-de Arkadagly Gahryman Serdarymyza alkyş sözlerimizi aýdýarys.
Oguljahan JOBBOROWA,
Türkmenistanyň Daşary işler ministrliginiň
Halkara gatnaşyklary institutynyň
Halkara hukugy fakultetiniň 5-nji ýyl talyby.