Çäksiz buýsanjyň beýany
«Halkyň Arkadagly zamanasy» ýylynda meniň durmuşymda ýatdan çykmajak wakalaryň biri boldy. Maňa bu ýylda Türkmenistanyň Daşary işler ministrliginiň Halkara gatnaşyklary institutynyň Halkara žurnalistikasy fakultetiniň Halkara žurnalistikasy hünäriniň talyby bolmak bagty miýesser etdi.
Berkarar döwletiň täze eýýamynyň Galkynyşy döwründe hormatly Prezidentimiziň baştutanlygynda biz ýaşlaryň öz ukyp-başarnyklarymyzy açyp görkezip, kämil hünärmenler bolup ýetişmegimiz üçin uly mümkinçilikler döredilýär. «Halkyň Arkadagly zamanasy» diýlip atlandyrylan 2022-nji ýylda Ýaş diplomatlaryň mekdebiniň hem-de Türkmenistanyň Daşary işler ministrliginiň Halkara gatnaşyklary institutynyň bilelikde guramagynda mekdep okuwçylarynyň arasynda geçirilen «Parahatçylygyň ýaş çaparlary» atly akyl-paýhas bäsleşiginiň I saýlama tapgyrynyň 8-nji oýnuna gatnaşdym. Bäsleşige gatnaşmazdan ozal, mekdep okuwçylary üçin welaýat merkezlerinde halypa mugallymlaryň gatnaşmagynda wideo sapagy geçirildi. Bu wideo sapagyň dowamynda hormatly Prezidentimiziň Watanymyzy gülledip ösdürmek ugrunda alyp barýan içeri we daşary syýasaty dogrusynda giňişleýin gürrüň berildi.
Men «Parahatçylygyň ýaş çaparlary» akyl-paýhas bäsleşigine gatnaşmak üçin Türkmenistanyň Daşary işler ministrliginiň Halkara gatnaşyklary institutyna gelenimde, bu ýerde okaýan talyplary görüp, bu ýokary okuwyň talyby bolmagy arzuw etdim. Gahryman Arkadagymyzyň hem-de Arkadagly Serdarymyzyň biz — ýaşlara okamaga, öwrenmäge döredip berýän mümkinçiliklerinden peýdalanyp, ata Watanymyzyň bedew batly ösüşine geljekde ussat žurnalist hökmünde öz goşandymy goşmak baradaky arzuwym wysal boldy. Men muňa diýseň begenýärin.
Men orta mekdepde okaýan döwürlerimde döredijilik, çeper okaýyş hem-de Gahryman Arkadagymyzyň atalyk kitaplaryny okamak bilen ýakyndan gyzyklanýardym, döwlet derejesinde geçirilýän dürli bäsleşiklere işjeň gatnaşýardym. Birnäçe bäsleşikleriň hem-de olimpiadalaryň ýeňijisi bolup, baýrakly orunlara mynasyp boldum. 2021-nji ýylda Türkmenistanyň Magtymguly adyndaky Ýaşlar guramasynyň Merkezi Geňeşiniň hem-de «Nesil» gazetiniň redaksiýasynyň bilelikde guramagynda geçirilen «Berkarar döwletiň ylham joşguny» atly döredijilik bäsleşiginiň, Türkmenistanyň Magtymguly adyndaky Ýaşlar guramasynyň Merkezi Geňeşiniň hem-de «Güneş» žurnalynyň redaksiýasynyň bilelikde guramagynda geçirilen «Arkadagly eziz Diýar — Watanym, Garaşsyzlyk bilen bagta ýetenim» atly çeper döredijilik bäsleşiginiň ýeňijisi boldum. Şeýle-de «Türkmenistanyň Konstitusiýasynyň we Türkmenistanyň Döwlet Baýdagynyň» güni mynasybetli geçirilen düzme ýazmak boýunça bäsleşiginiň welaýat tapgyrynda II orna mynasyp boldum.
Asuda asmanymyzyň astynda parahat zeminimiziň üstünde gülleýän gül açýan ata Watanymyzy wasp etmedik şahyr, aýdym edip aýtmadyk bagşy ýok bolsa gerek. Men hem ýaş şahyr hökmünde gül Diýarymyzyň ösüşini, Gahryman Arkadagymyzyň, hormatly Prezidentimiziň, ata Watanymyzyň dünýä ýüzündäki halkara abraýyny has-da belende galdyrmak baradaky edýän tagallalaryny öz ýazýan makalalarymda, şygyrlarymda wasp edýärin. Watanymyzyň geljegi bolan biz — ýaş nesillere okamaga, öwrenmäge, öz ukyp-başarnyklarymyzy açyp görkezmäge döredip berýän mümkinçilikleri üçin Gahryman Arkadagymyza, Arkadagly Serdarymyza köp sagbolsun aýdýarys. Goý, Gahryman Arkadagymyzyň, Arkadagly Serdarymyzyň janlary sag, belent başlary aman bolsun, ata Watanymyzy ösdürmek ugrunda alyp barýan döwletli işleri mundan beýläk hem rowana menzillerde rowaçlyklara beslensin!
Gülnara MYRADOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň I ýyl talyby.