Bilim ulgamynda halkara hyzmatdaşlyk
Mälim bolşy ýaly, 2008-nji ýylyň 20-nji martynda Gahryman Arkadagymyzyň Türkmenistanyň Daşary işler ministrliginiň garamagynda Halkara gatnaşyklary institutyny döretmek hakyndaky çözgüdi ýurdumyzyň diplomatik gullugy üçin ýokary hünärli işgärleri taýýarlamak boýunça bir bitewi ulgamy kemala getirmegiň başlangyjy boldy. Munuň özi daşary syýasat we halkara gatnaşyklarynda hereket edýän döwlet düzümlerinde häzirki zaman ösüşiň möhüm meseleleri boýunça ylmy-barlag işlerini alyp barýan hünärmenleriň üpjünçiligine gönükdirildi.
Häzirki wagtda Türkmenistanyň bilim ulgamyny ösdürmek, kämil hünärmenleri taýýarlamakda halkara hyzmatdaşlygy giňeltmek, ýurdumyzyň ýokary okuw mekdepleri bilen daşary ýurt döwletleriniň bilim edaralarynyň hyzmatdaşlygyny ýola goýmak babatynda uly işler alnyp barylýar. Türkmenistanyň Daşary işler ministrliginiň garamagynda Halkara gatnaşyklary instituty Garaşsyz, Bitarap döwletimiziň daşary syýasatyny alyp barýan, daşary ýurtlarda Türkmenistana wekilçilik edýän, onuň milli bähbitlerini goraýan hem-de Watanymyzyň halkara abraýynyň berkidilmegi ugrunda degişli işleri alyp barýan türkmen diplomatlarynyň täze neslini kemala getirmekde jogapkärli wezipäni durmuşa geçirýär. Institut döredileninden bäri, 36 sany daşary ýurt ýokary okuw mekdebi bilen özara düşünişmek hakynda Ähtnama baglaşyldy. Olaryň çäklerinde döwletleriň bilim ulgamynda toplan oňyn tejribesini öwrenmek we bu babatda halkara hyzmatdaşlygy has-da işjeňleşdirmek maksady bilen, birnäçe saparlar, ylmy-amaly maslahatlar, seminarlar guraldy.
Öňde durýan maksatlara ýetmekde ýokary hünärli diplomatik işgärlere, halkaraçy hünärmenlere möhüm orun degişlidir. Munuň özi döwletara gatnaşyklaryň ähli ugurlaryny ösdürmek, türkmen döwletiniň dünýä giňişliginde eýeleýän ornuny we abraýyny pugtalandyrmak üçin has oňyn şertleriň we ýagdaýlaryň döredilmegini üpjün eder. Bu babatda hormatly Prezidentimiziň oňyn, täzeçil daşary syýasat başlangyçlaryny we tekliplerini çuňňur öwrenmek institutyň ylmy-barlag işleriniň esasy ugry bolup durýar.
Dürli BALLYÝEWA,
TDIM-iň Halkara gatnaşyklary institutynyň uly mugallymy.