TÜRKMENISTANYŇ WEKILIÝETI «RUSSIÝA – YSLAM DÜNÝÄSI: KAZANFORUM» HALKARA YKDYSADY FORUMYNA GATNAŞAR
Türkmenistan bilen Russiýa döwleti bilen halkara giňişlikde işjeň hyzmatdaşlyk edýärler. BMG-niň we beýleki iri halkara guramalaryň çäklerinde aýratyn ähmiýetli başlangyçlarydyr teklipleri ilerletmekde birek-biregi yzygiderli goldaýarlar.
Türkmenistan we Russiýa Federasiýasy oňyn syýasy-diplomatik gatnaşyklary ösdürmek bilen, söwda-ykdysady ulgamda, ýangyç-energetika toplumynda we beýleki pudaklarda netijeli hyzmatdaşlyk edýärler. Bu ugurlarda bar bolan kuwwatlyklary hasaba almak arkaly umumy tagallalaryň birleşdirilmegi has netijeli hasap edilýär.
Türkmen halkynyň Milli Lideri Gahryman Arkadagymyzyň, peder ýoluny üstünlikli dowam etdirýän Arkadagly Gahryman Serdarymyzyň energetika ulgamynda halkara başlangyçlaryny amala aşyrmakda we sebitde hyzmatdaşlygy, ynanyşmagy berkitmekde «Russiýa - Yslam dünýäsi: KazanForum» halkara ykdysady forumynyň ähmiýetine aýratyn uly orun degişlidir.
2022-nji ýylda geçirilen bu foruma 6,3 müňden gowrak adam, Türkmenistanyň Halk Maslahatynyň Başlygy, Milli Liderimiz gatnaşypdy.
Taryha nazar salsak, «KazanForum 2022»-de Tatarystan Respublikasynyň Başlygy Rustam Minnihanow: «20 milliondan gowrak musulmanyň ýaşaýan Russiýasynyň Halal pudagy üçin uly geljegi bar. Mundan başga-da bu diňe bir iýmit däl, eýsem syýahatçylyk, lukmançylyk, IT tehnologiýalary we başga-da köp zat» diýip belläp geçdi.
KazanForumyň maksady Russiýa bilen Yslam hyzmatdaşlyk guramasyna girýän döwletleriň söwda-ykdysady, ylmy-tehniki, durmuş we medeni gatnaşyklaryny berkitmek bolup durýar. Ilkinji gezek forum 2009-njy ýylda geçirildi. 2023-nji ýylda Russiýa Federasiýasynyň Prezidentiniň Karary bilen foruma federal derejesi berildi.
Forumyň 2023-nji ýylyň 18-19-njy maýynda geçiriljek esasy çäresi halkara işewür gatnaşyklar we hyzmatdaşlygy ýola goýmak üçin meýdança bolan halkara standartyna laýyklykda Russiýanyň iň uly maýa goýum we infrastruktura taslamalar sergisi «Russiýa Halal Expo» boldy. Bu ýerde azyk we azyk däl önümler, lomaý we bölek söwda, inženerçilik, gurluşyk, moda we gözellik, maliýe we maýa goýum pudagyndaky halal hyzmatlar, syýahatçylyk, bilim, IT we saglygy goraýyş ýaly ugurlarda ýetilen sepgitler görkezilipdi.
Türkmenistanyň wekilýeti Tatarystanyň paýtagty Kazan şäherinde 2024-nji ýylyň 14-19-njy maýynda geçiriljek «Russiýa — Yslam dünýäsi: KazanForum» gatnaşmagyna hem-de bu halkara forumynyň çäginde geçiriljek sergide ýurdumyzyň ykdysadyýetinde gazanylan üstünliklerini görkezmeklerine garaşylýar.
Kazan Forumyň metbugat gullugynyň habar bermegine görä, çäräniň esasy temalary “Halal” senagaty, Yslam dininiň maliýeleri, ulag geçelgelerini we bilimi ösdürmek bolup durar. Mundan başga-da, foruma gatnaşyjylar syýahatçylyk, şol sanda lukmançylyk ýaly meseleleri ara alyp maslahatlaşarlar. Halkara forum Yslam ýurtlarynyň işewür wekillerini bir ýere jemlemegine garaşylýar.
Halkara ykdysady forumyna gatnaşyjylar Demirgazyk — Günorta halkara ulag geçelgesini ösdürmeginiň taslamasyny, şeýle hem bu taslamada konteýnerli ýük daşamalaryň 15-30 esse artdyrylmagyny maslahatlaşdylar.
Türkmenistanyň dünýä döwletleri bilen işjeň gatnaşygynyň ýola goýulmagy we yzygiderli ösdürilmegi biziň ýurdumyzda kabul edilýän milli Maksatnamalaryň üstünlikli ýerine ýetirilmegine özüniň saldamly goşandyny goşýar we Türkmenistanyň ýakyn wagtlarda dünýäniň ösen döwletleriniň hataryna ynamly goşulmagyna zerur bolan şertleri döredýär.
Sülgün NEPESOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary kafedrasynyň mugallymy.