Türkmenistan “Ekspo-2025” Bütindünýä sergisine gatnaşýanlaryň ýygnagynda wekilçilik etdi
Hormatly Prezidentimiziň baştutanlygynda Türkmenistanyň dünýä ykdysadyýetine intgerirlenmegini hem-de daşary ýurtlar bilen aragatnaşygyň çuňlaşdyrylmagyny göz öňünde tutýan «Açyk gapylar» syýasaty işjeň alnyp barylýar. Ykdysady özgertmeler we durmuşa gönükdirilen bazar ykdysadyýetini emele getirmek boýunça çäreler yzygiderli amala aşyrylýar. Türkmenistanyň daşary ykdysady syýasaty daşary maýa goýumlaryny, kämil tehnologiýalaryny we dolandyryş tejribelerini çekmekligi, ýurdumyzyň ösüşini diwersifisirlemek, kämilleşdirmek maksady bilen dünýä bazaryna çykmaklygy göz öňünde tutýar.
Hormatly Prezidentimiziň daşary ýurt döwletleri bilen söwda-ykdysady hyzmatdaşlygyny ösdürmek babatda ýygy-ýygydan berýän tabşyryklaryndan ugur alyp, häzirki wagtda Türkmenistan söwda-ykdysady hyzmatdaşlyk babatda dünýäniň ençeme döwleti bilen ysnyşykly gatnaşyklary ýola goýdy, şeýle hem alnyp barylýan hyzmatdaşlygy has-da berkitmek, ýurdumyzyň ykdysadyýetiniň dürli pudaklarynda hyzmatdaşlygy alyp barmak üçin, ykdysady hyzmatdaşlyk boýunça hökümetara toparlar döredilip, häzir olar netijeli işleri alyp barýarlar.
Hormatly Prezidentimiziň daşary syýasaty netijesinde Türkmenistanda maýa goýum taslamalaryny, şol sanda dünýäniň dürli döwletleriniň işewürleriniň Türkmenistanyň ykdysadyýetiniň esasy pudaklaryny özgertmegiň giň gerimli maksatnamalaryny amala aşyrmaga gatnaşmagy üçin oňaýly şertler döredilýär.
2023-nji ýylyň 14-16-njy noýabrynda Söwda we daşary ykdysady gatnaşyklar ministriniň ýolbaşçylygyndaky türkmen wekiliýeti Osakada geçirilen “Ekspo-2025” Bütindünýä sergisiniň halkara gatnaşyjylarynyň ýygnagyna gatnaşdy.
Çäräniň dowamynda Türkmenistanyň wekiliýeti Ýaponiýanyň öňdebaryjy kompaniýalarynyň wekilleri, şeýle hem Halkara sergiler býurosynyň Baş sekretary, Ýaponiýanyň ykdysadyýet, söwda we senagat ministriniň orunbasary we Ýaponiýanyň “Ekspo-2025” Bütindünýä sergisiniň assosiasiýasynyň baş sekretary bilen möhüm duşuşyklary geçirdi.
Gepleşikleriň esasy temalaryndan biri Türkmenistanyň çärä taýýarlyk görmekdäki üstünligi boldy. Ýapon tarapy zerur resminamalaryň öz wagtynda tabşyrylandygy üçin minnetdarlyk bildirdi we Türkmenistanyň gatnaşmagynyň möhümdigini aýtdy.
Türkmenistan döwletimiziň Milli pawilionyň gurluşygy üçin ýer bermek dabarasyna aýratyn üns berildi. 2023-nji ýylyň 16-njy noýabry ýer böleginiň resmi taýdan Türkmenistana geçirilen güni boldy. Bu hereket, Türkmenistanyň dünýä jemgyýetindäki ornunyň ähmiýetini nygtaýan “EXPO 2025” sergisiniň daşary ýurtly gatnaşyjylaryň arasynda ilkinji bolup durýar. Resminamanyň tanyşdyrylyşy, bu möhüm pursatyň giňişleýin beýan edilmegini üpjün edip, ýerli we daşary ýurt habar beriş serişdeleriniň wekilleriniň gatnaşmagynda geçirildi.
Häzirki wagtda Türkmenistan döwletimiz günsaýyn gülläp ösýär. Ýurdumyzyň geljekde hem dünýä ýutlary bilen özara bähbitli hyzmatdaşlygyny artdyrmaga giň mümkinçilikleriniň bardygyny belläp geçmelidiris. Türkmenistanyň dünýä döwletleri bilen işjeň gatnaşygynyň ýola goýulmagy we yzygiderli ösdürilmegi biziň ýurdumýzda kabul edilýän milli Maksatnamalaryň üstünlikli ýerine ýetirilmegine özüniň saldamly goşandyny goşýar we Türkmenistanyň ýakyn wagtlarda dünýäniň ösen döwletleriniň hataryna ynamly goşulmagyna zerur bolan şertleri döredýär.
Gyzylgül GURBANMUHAMEDOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
kafedrasynyň mugallymy.