Türkmen önümleri “Korean Import Fair” halkara sergisinde görkezildi
Berkarar döwletiň täze eýýamynyň Galkynyşy döwründe ýurdumyz günsaýyn ösüşlere beslenýär. Watanymyz Türkmenistan Gahryman Arkadagymyzyň parasatly başlangyçlaryny mynasyp dowam etdirýän Arkadagly Serdarymyzyň taýsyz tagallalary bilen dünýäde rowaçly ösýän ýurtlaryň birine öwrülýär. Munuň şeýledigini mähriban Watanymyzyň dünýäniň dürli halkara guramalary bilen işjeň hyzmatdaşlygy üstünlikli alyp barýanlygy hem aýdyň görkezýär.
Türkmenistan bilen Koreýa halkara giňişliginde işjeň hyzmatdaşlyk edýärler, BMG-niň we beýleki iri halkara guramalaryň çäklerinde aýratyn ähmiýetli başlangyçlarydyr teklipleri ilerletmekde birek-biregi yzygiderli goldaýarlar.
Türkmenistan we Koreýa Respublikasy oňyn syýasy-diplomatik gatnaşyklary ösdürmek bilen, söwda-ykdysady ulgamda we beýleki pudaklarda netijeli hyzmatdaşlyk edýärler. Bu ugurlarda bar bolan kuwwatlyklary hasaba almak arkaly umumy tagallalaryň birleşdirilmegi has netijeli hasap edilýär.
Türkmen telekeçileri 2023-nji ýylyň 29-njy iýunyndan 1-nji iýuly aralygynda Koreýa Respublikasynda geçirilen “Korea Import Fair” XX halkara sergisine gatnaşdylar. Serginiň dowamynda dünýäniň 50 ýurdundan 150 töweregi iri kompaniýanyň önümleri, şol sanda türkmen önümleriniň dürli görnüşleri hödürlendi.
Türkmenistanyň milli powilýonynda türkmen halylary, dokma önümleri, nah we ýüpek matalaryň dürli görnüşleri we ýokary hilli egin-eşikler görkezildi.
Türkmenistanda öndürilen ýokary hilli we özboluşly önümler “Korea Import Fair” halkara sergisine gatnaşyjylaryň arasynda uly gyzyklanma döretdi.
Türkmen telekeçileriniň bu çärä gatnaşmagy bilen milli önümleri dünýä bazarlaryna çykarmaga we beýleki ýurtlar bilen ykdysady gatnaşyklary pugtalandyrmaga täze mümkinçilikleri döreder.
Türkmenistan we Koreýa bar bolan mümkinçilikleri göz öňünde tutup, umumy tagallalaryň ulanylmagy iň täsirli hasaplanýan, söwda we ykdysady ugur, ýangyç we energetika toplumy we beýleki birnäçe pudaklarda öndürijilikli hyzmatdaşlyk edýärler.
Sülgün NEPESOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
kafedrasynyň mugallymy.