Türkmen halkynyň Milli Lideri «Russiýa — Yslam dünýäsi: KazanForum — 2024» XV halkara ykdysady forumyna gatnaşdy
15 — 19-njy maýda Russiýa Federasiýasynyň Kazan şäherinde ýerleşýän «Kazan Ekspo» halkara sergi merkezinde «Russiýa — Yslam dünýäsi: KazanForum» atly XV halkara ykdysady forumy geçirildi.
Russiýa bilen Yslam Hyzmatdaşlyk Guramasynyň ýurtlarynyň arasynda söwda-ykdysady, ylmy-tehniki, durmuş-medeni ugurly gatnaşyklary pugtalandyrmak, şeýle hem Russiýa Federasiýasynda yslam maliýe ulgamy düzümleriniň ösdürilmegine ýardam bermek forumyň esasy maksadydyr. Şu ýyl «KazanForuma» 80-ä gowrak döwletiň, şol sanda YHG-na agza ýurtlaryň 40-synyň, Russiýanyň sebitleriniň 83-siniň wekilleri gatnaşdylar. Ol «Ynanyşmak we hyzmatdaşlyk» şygary astynda geçdi.
Halkara ähmiýetli çärä Tatarystan Respublikasynyň Baştutany Rustam Minnihanowyň çakylygy boýunça türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow hem gatnaşdy. Şeýle-de saparyň çäklerinde Gahryman Arkadagymyz Gurbanguly Berdimuhamedow bilen Tatarystanyň Baştutany Rustam Minnihanowyň arasynda iki tarapyň wekiliýetleriniň gatnaşmagynda duşuşyk geçirildi. Duşuşygyň dowamynda taraplar nebit-gaz, gämi gurluşygy, himiýa senagaty pudaklarynda, awiasiýa tehnikasyny, ýük awtoulaglaryny ibermek babatda durmuşa geçirilýän ähmiýetli işler dogrusynda nygtadylar.
Ilkinji gezek 2009-njy ýylda geçirilen «KazanForumyň» maksady Russiýa Federasiýasy bilen Yslam hyzmatdaşlyk guramasyna girýän döwletleriň söwda-ykdysady, ylmy-tehniki, durmuş we medeni gatnaşyklaryny ösdürmekden ybarat bolup durýar.
Forumyň çäklerinde Russiýanyň iň iri halal platformasy bolan «Kazan Halal Market» sergisi geçirildi. Onda dünýä döwletlerinden gelen wekiller 4,5 müňden gowrak görnüşli önüm görkezdiler. Has dogrusy, sergide azyk we azyk däl önümler, lomaý we bölek söwda, inženerçilik, gurluşyk, moda we gözellik, maliýe we maýa goýum pudagyndaky halal hyzmatlar, syýahatçylyk, bilim, IT we saglygy goraýyş ulgamlarynda ýetilen sepgitler öz beýanyny tapdy.
Ýurdumyzyň bu wekilçilikli sergä gatnaşmagy Russiýa bilen söwda-ykdysady gatnaşyklary ösdürmäge, dünýäniň halal önümler bazarynda Türkmenistanyň ornuny pugtalandyrmaga, milli ykdysadyýetimize maýa goýumlary çekmäge ýardam berer.
Türkmen halkynyň Milli Lideri we Tatarystan Respublikasynyň Baştutany iri rus kompaniýalarynyň bu ýerde görkezilen özboluşly taslamalary, döwrebap tehnologiýalary, senagat, raýat, ýol, ýaşaýyş jaý gurluşygy üçin enjamlar, gurluşyk serişdeleri, ýolgurluşyk tehnikalary bilen tanyşdylar.
Sülgün NEPESOWA,
TDIM-iň Halkara gatnaşyklary institutynyň mugallymy.
Çeşme: "Biznes reklama" gazeti -20.05.2024 ý. //