TENNIS ÝARYŞY: parahatçylyk, dostluk, sagdynlyk
Türkmenistan häzirki wagtda ösen sport ulgamly, dünýä derejesindäki ýaryşlary üstünlikli geçirmekde ähmiýetli tejribesi bolan, halkara sport hyzmatdaşlygy ulgamyna işjeň gatnaşýan ýurt bolup durýar. Bilşimiz ýaly, 5 — 9-njy iýun aralygynda paýtagtymyzda 12 ýaşly we ondan kiçi ýetginjek oglan-gyzlaryň arasynda tennis boýunça Merkezi Aziýa ýurtlarynyň sebitleýin ýaryşy ýokary guramaçylykly geçirildi. Bu iri sport çäresi milli sport diplomatiýamyzyň ajaýyp üstünligidir. Ýaryşa gatnaşmak üçin Aşgabada gelen daşary ýurtly hünärmenler bilen söhbetdeş bolanymyzda, olar bu gezekki sport baýramçylygynyň guramaçylyk derejesine ýokary baha berdiler.
Amir BORGEÝ,
Halkara tennis federasiýasynyň (ITF)
Aziýa sebiti
boýunça jogapkär wekili:
***
— Sport diplomatiýasynda alnyp barylýan işlerde häzirki zamanyň öňdebaryjy talaplaryny gazanmagy baş wezipe edinýän Türkmenistanyň halkara abraýy günsaýyn artýar. Ajaýyp sport desgalary bilen bilelikde, bu sport ýaryşyny geçirmek üçin türkmen tarapyndan ähli şertler döredilipdir. Ýaryşa gatnaşmaga gelen türgenleriň we hünärmenleriň türkmen myhmansöýerligi bilen garşy alynmagy, bize köp sanly meýletinçileriň ýardam etmegi örän begendirdi. Bu ýaryş tennisçileriň iň ýaş nesli üçin özlerini görkezmek üçin ajaýyp mümkinçilikdir. Tennis sportuny ösdürmäge goşýan ägirt uly goşandy üçin Halkara tennis federasiýasynyň adyndan Türkmenistanyň ýolbaşçylaryna tüýs ýürekden hoşallygymy bildirýärin.
Ýewgeniýa ŞUŞKOWA,
Gazagystan Respublikasynyň milli ýygyndysynyň
baş tälimçisi, sport ussady:
— Güneşli Türkmenistanda ozal hem birnäçe iri ýaryşlaryň ýokary derejede guralandygy bütin dünýä aýdyňdyr. Aşgabadyň ajaýyp Olimpiýa şäherçesindäki döwrebap Tennis toplumynda guralan şu gezekki sebitleýin ýaryşa gatnaşandygymyza örän begenýäris. Sebitiň ýaş tennisçilerini bir ýere jemlän ýaryşa gatnaşmagyň biziň üçin gymmatly tejribe boljakdygyny belläsim gelýär. Geçirilen duşuşyklaryň çekeleşikli häsiýete eýe bolmagy, türgenleriň bu ýaryşa ýokary taýýarlykly gelendigini görkezýär. Aşgabadyň gözel künjeklerine guralan gezelençler ýaşajyk tennisçilerimizde uly täsir galdyrdy.
"Ýaş diplomatyň sesi" internet gazeti 10.06.2023
Ýazga geçiren:
Atamyrat ÝAZWELIÝEW,
Halkara žurnalistikasy fakultetiniň
I ýyl talyby.