Talyplyk — ýaşlygyň arzyly menzili
Akyldarlaryň aýdan bir sözi bar: «Arzuwlaryň nirede bolsa sen hem şol ýerde bolarsyň». Edilen arzuwlaram biziň Watanymyzda bolsa oňa ýetesi zat ýok. Çünki Garaşsyz, baky Bitarap Türkmenistan Watanymyz arzuwlaryň wysal bolýan ülkesi.
Heniz mekdep partasynda wagtym takyk ugurlaryndan ýokary bilim alyp, Watanymyzyň ösüşine goşant goşjak ýaşlaryň biri bolup ýetişmegi arzuw edýärdim. Men Arkadag Serdarly bagtyýar ýaşlar ýylynda ýurdumyzyň orta mekdepleriniň 11-nji synp okuwçylarynyň arasynda Birleşen Milletler Guramasy tarapyndan yglan edilen Bilimler güni mynasybetli Türkmenistanyň Daşary işler ministrliginiň Halkara gatnaşyklary institutynyň Magtymguly adyndaky Ýaşlar Guramasynyň Merkezi geňeşi bilen bilelikde «Watanyň daýanjy — bilimli ýaşlar, Arkadag Serdaryň guwanjy ýaşlar!» atly Türkmenistanyň taryhy, matematika, türkmen dili, iňlis dili dersleri boýunça geçirilen olimpiadada matematika dersinden 2-nji orna mynasyp boldum. Bu gün bolsa Türkmenistanyň Daşary işler ministrliginiň Halkara gatnaşyklary institutynyň halkara ykdysady gatnaşyklary fakultetiniň giriş synaglaryndan üstünlikli geçip, türkmen diplomatiýasynyň milli mekdebiniň bagtyýar talyby boldum.
Döwletimiziň ähli ulgamlaryny döwrebap ösdürmäge, biz ýaşlara okamaga, döretmäge, ukyp-başarnygymyzy ýüze çykarmaga döredip berýän mümkinçilikleri üçin Gahryman Arkadagymyza, hormatly Prezidentimize çäksiz sagbolsun aýdýaryn.
Bägül HUDAÝBERDIÝEWA,
Türkmenistanyň Daşary işler ministrliginiň
Halkara gatnaşyklary institutynyň I ýyl talyby.