Buşluk, talyp boldum!
Yhlas edip aglasaň, sokur gözden ýaş çykar. Ymgyr manyly sözler. Bu sözleriň manysyna has çuňňur akyl ýetirdim. Sebäbimi? Men heniz mekdep partasynda wagtym žurnalistika hünärinden ylym-bilim alyp, ýurdumyzda bolup geçýän täzelikleri, üstünleri halkymyza, tutuş dünýä jemgyýetçiligine ýetirmegi arzuw edýärdim. Şonuň üçin hem köp kitap okaýardym, daşary ýurt dillerini öwrenýärdim.
Men ýurdumyzyň orta mekdepleriniň 11-nji synp okuwçylarynyň arasynda Birleşen Milletler Guramasy tarapyndan yglan edilen Bilimler güni mynasybetli Türkmenistanyň Daşary işler ministrliginiň Halkara gatnaşyklary institutynyň hem-de Magtymguly adyndaky Ýaşlar Guramasynyň Merkezi geňeşiniň bilelikde «Watanyň daýanjy — bilimli ýaşlar, Arkadag Serdaryň guwanjy ýaşlar!» atly Türkmenistanyň taryhy, matematika, türkmen dili, iňlis dili dersleri boýunça geçirilen olimpiada gatnaşyp, Hormat haty bilen sylaglandym. Şeýle-de 2022-nji ýylyň noýabr aýynda Ýaponiýanyň Türkmenistanda geçirilen Medeniýet günleriniň çäklerinde çykyş etdim.
Ine, bu günki gün — Arkadag Serdarly bagtyýar ýaşlar ýylynda yhlasym myrada gowuşdy. Men talyp boldum. Onda-da ýurdumyzyň iň baýry ýokary okuw mekdebiniň — Türkmenistanyň Daşary işler ministrliginiň Halkara gatnaşyklary institutynyň.
Bize okamaga, döretmäge, öz ukyp-başarnyklarymyzy açyp görkezmäge döredip berýän giň mümkinçilikleri üçin Gahryman Arkadagymyza, hormatly Prezidentimize çäksiz hoşallygymy aýdýaryn.
Tumar JOLLYKOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara žurnalistikasy fakultetiniň 1-nji ýyl talyby.