Arkadag şäherinde geçirilen halkara maýa goýum forumy üstünliklere beslendi
Berkarar döwletiň täze eýýamynyň Galkynyşy döwründe ýurdumyz gün saýyn ösüşlere beslenýär.
Berkarar döwletiň täze eýýamynyň Galkynyşy döwründe hormatly Prezidentimiziň alyp barýan ynsanperwer dașary we içeri syýasaty netijesinde Türkmenistan döwletimiz halkara abraýy günsaýyn belende galýar. Türkmenistan bilen ýakyn-alysdaky döwletler dost-doganlyk we özara bähbitli gatnaşyklary döwrebap ösdürmeklige işjeň gatnaşýarlar.
Watanymyz Türkmenistan Gahryman Arkadagymyzyň parasatly başlangyçlaryny mynasyp dowam etdirýän Arkadagly Serdarymyzyň taýsyz tagallalary bilen dünýäde rowaçly ösýän ýurtlaryň birine öwrülýär. Munuň şeýledigini mähriban Watanymyzyň dünýäniň dürli halkara guramalary bilen işjeň hyzmatdaşlygy üstünlikli alyp barýanlygy hem aýdyň görkezýär.
Halkymyzda ýol, köpri gurmak, bina galdyrmak sogap iş hasaplanýar. Bu düşünje asyrlaryň dowamynda sünnälenip, asylly ýörelgä öwrülip, milli gymmatlyk hökmünde biziň günlerimize ýetip gelipdir. Ata-babalarymyzyň döwletlilik ýörelgelerine uly sarpa goýýan Gahryman Arkadagymyzyň, Arkadagly Serdarymyzyň taýsyz tagallalary netijesinde bu gün sebitde deňi-taýy bolmadyk täze, döwrebap Arkadag şäheri döredi. Watanymyzyň, halkymyzyň beýik geljegine gönükdirilen döwletli tutumlar ildeşlerimiziň her biriniň kalbynda buýsanç, guwanç duýgusyny döredýär.
Türkmenistanyň Senagatçylar we telekeçiler birleşmesiniň guramagynda 2023-nji ýylyň 30-njy iýunynda Arkadag şäherinde ýerleşýän “Märkaw” myhmanhanasynda “Arkadag — “akylly” şäher” atly halkara maýa goýum forumy geçdi.
Bu halkara foruma türkmen telekeçileri bilen bir hatarda, dünýäniň dürli ýurtlaryndan 10-dan gowrak hususy kompaniýalaryň hem-de iri ugurdaş halkara guramalaryň, banklaryň wekilleri gatnaşdylar.
Halkara maýa goýum forumynyň birinji bölümçesinde “Ösüşiň geljegi we şäherlerdäki täze tehnologiýalar” boýunça çykyşlar diňlenildi. Ikinji bölümçede bolsa, “John Deere” kompaniýasynyň GDA ýurtlary boýunça wise-prezidenti, “JCD UK LTD” kompaniýasynyň Halkara satuwlar boýunça sebitleýin müdiri, Täjigistanyň “Samo” kompaniýasynyň ýolbaşçysy şeýle hem türkmen maýa goýumçylary çykyş etdiler.
“Arkadag — “akylly” şäher” atly halkara maýa goýum forumynyň mejlislerinde Türkmenistanyň ýokary derejede ösen we täze sanly çözgütlere daýanýan intellektual jemgyýeti gurmaga gönükdirilen maýa goýum mümkinçilikleri, Arkadag şäheri döredilende işjeň ulanylan döwlet-hususy hyzmatdaşlygy, maýa goýumlaryň ileri tutulýan ugurlary, şäher ykdysadyýetiniň dürli ugurlaryna sanly innowasiýalary ornaşdyrmak, ýaşaýjylar üçin iň oňaýly, amatly we howpsuz ýaşaýyş şertlerini üpjün etmäge gönükdirilen, şäher gurşawyny döretmek bilen baglanyşykly meseleler ara alnyp maslahatlaşdylar.
“Akylly şäher” Arkadag” atly halkara maýa goýum forumynyň çäklerinde ikitaraplaýyn duşuşyklar geçirildi we birnäçe resminamalara gol çekildi.
Bu halkara maýa goýum forumynyň çäklerinde türkmen telekeçileriniň önümleriniň sergi-ýarmarkasy guraldy, daşary ýurtly hyzmatdaşlar bilen ikitaraplaýyn duşuşyklaryň geçirildi.
Ýurdumyzyň halkara derejesinde abraýyny belende götermäge giň mümkinçilikleri döredip berýän Gahryman Arkadagymyzyň we Arkadagly Serdarymyzyň janlary sag, alyp barýan işleri elmydama rowaç bolsun!
Sülgün NEPESOWA,
Türkmenistanyň Daşary işler ministrliginiň
Halkara gatnaşyklary institutynyň
Halkara ykdysady gatnaşyklary
kafedrasynyň mugallymy.